Edhe pse rreth një vit më parë 35-vjeçarit i kishin vrarë vëllanë pas një konflikti për drogë, Oslon Çutaj, sërish nuk ka hequr dorë nga ky aktivitet kriminal.
Në tetor të vitit 2020 vëllai i Oslon Çutajt, Vilsoni u vra në malet e Dukagjinit bashkë me Klement Pepajn. Ata u qëlluan për vdekje nga Danjel Pepaj, i cili vazhdon të jetë ende në kërkim.
Dinamika e ngjarjes
Në 8 tetor u gjetën trupat e pajetë të dy të rinjve, K. Pepajt dhe V. Çutajt, ngjarje tronditëse e cila dyshohet të ketë nisur pas një konflikti të ashpër për çështje që lidhen me kultivimin e kanabisit në fshatin Vrith të Malësisë së Madhe. I dyshuari kryesor për vrasjen e të rinjve është D. Pepaj, i cili nga të dhënat mësohet të ketë qëlluar gjakëftohtësisht drejt kushëririt të tij K. Pepaj dhe shokut të tij V. Çutaj, pas një sherri për parcelat e kanabisit. Referuar dinamikës së ngjarjes nga të dhënat e banorëve dhe grupeve hetimore, mësohet se filli i kësaj historie nis teksa D. Pepaj, 1 ditë para raportimit të zhdukjes së tyre, pas një sherri, është rrahur shumë keq nga V. Çutaj dhe K. Pepaj në Bajzë, teksa këta të fundit e akuzonin se kishte vjedhur një sasi kanabisi, e cila u përkiste atyre. Në kushtet e torturave fillimisht D. Pepaj mendohet të ketë mohuar se është ai autori i vjedhjes së parcelave me kanabis, por më pas është detyruar që të thotë “po”. Pas sherrit, nga Bajza janë nisur drejt Vrithit duke iu ngjitur malit ndërsa atje D. Pepaj dyshohet se ka marrë një armë të fshehur dhe i ka qëlluar të dy personat që e kanë rrahur më përpara. Ndërsa referuar burimeve nga fshati Vrith tregojnë se nuk është vjedhur vetëm parcela e V. Çutaj dhe K. Pepaj, por edhe dy parcela të tjera që kanë qenë aty afër. Mësohet se D. Pepaj ka patur parcelën e tij me kanabis ndërsa V. Çutaj dhe K. Pepaj dyshohet se kanë patur një tjetër veçmas.
