EMRI/ Vrasja në burgun e Peqinit, emërohet drejtori i ri -

Një javë pas ngjarjes së rëndë në burgun e Peqinit, ku një i dënuar vrau një të burgosur dhe plagosi një tjetër, është emëruar drejtori i ri i këtij institucioni.

Mësohet se Florenc Doka do të zëvendësojë Kamber Hoxhën, i cili ndodhet pas hekurave pas vrasjes që ndodhi në burg. Doka është prezantuar dje si drejtor i burgut të sigurisë së lartë.

Kamber Hoxha u arrestua për shpërdorim detyre pasi i dënuari me burgim të përjeshtëm, Sokol Mjacaj, qëlloi për vdekje me armë të dënuarin tjetër Arben Lleshi, si edhe plagosi Indrit Shaqjan.

Dinamika e ngjarjes

Prokuroria e Elbasanit në një komunikatë një ditë pas krimit zbuloi dinamikën e ngjarjes së rëndë në burgun e sigurisë së lartë të Peqinit, ku i dënuari me burgim të përjetshëm për vrasjen e dy turistëve çek, qëlloi për vdekje me tre plumba Arben Lleshin.

Organi hetues informoi se arma e zjarrit është futur në burgun e Peqinit dhe më pas është mbajtur në dhomë nga i dënuari Sokol Mjaca për rreth 20 ditë. Madje, dyshohet se i dënuari me burgim të përjetshë e ka mbajtur pistoletën edhe në ambjetet e përbashkëta në këtë burg (ajrim, apo rregjimi brendshëm).

Sa i përket momentit të krimit të ndodhur rreth orës 13:52 mesditën e së premtes (15 Dhjetor), Prokuroria e Elbasanit sqaron se Sokol Mjacaj ka qëlluar me pistoletë në drejtim të Arben Lleshit duke e lënë të vdekur në vend, si edhe ka plagosur të dënuarin tjetër Indrit Shaqja.

Pas krimit, prokuroria sqaron se 28-vjeçari ka kërcënuar gardianët me armë dhe më pas është izoluar me pistoletën në dorë në ambjentet e takimeve me familjarët në këtë burg.

Ndërkohë janë ngritur dyshime se nga punonjësit e shërbimit, nuk kanë përmbushur detyrat funksionale, pasi nuk kanë kryer kontrollin fizik, që konsiston dalja e të dënuarit nga dhoma për ajrim dhe kthimin nga ajrimi për në dhomë në ditën e ngjarjes si dhe në ditët e mëparshme.

Në cilësinë e provës materiale janë sekuestruara një armë zjarri, 5 gëzhoja, si dhe dy predha të dëmtuara.

Zyrtarët e ndaluar të burgut të Peqinit:

Kamber Hoxha, 59 vjeç, banues në Tiranë, me detyrë Drejtor i IEVP Peqin;

Qani Muça, 60 vjeç, banues në Elbasan, me detyrë shef i Policisë së IEVP Peqin;

Nikolin Gjonpalaj, 54 vjeç, banues në Tiranë, ish-shef i Policisë së IEVP Peqin;

Vilson Shima, 37 vjeç, banues në Tiranë, me detyrë shef regjimi në IEVP Peqin;

Arben Dulellari, 52 vjeç, banues në Tiranë, me detyrë specialist i informacionit në sallën operative të IEVP Peqin;

Fatos Pire, 50 vjeç, banues në Belsh, polic shërbimi i IEVP Peqin;

Ilir Balla, 46 vjeç, banues në Peqin, polic shërbimi i IEVP Peqin;

Florenc Mile, 43 vjeç, banues në Lushnje, polic shërbimi i IEVP Peqin;

Genci Muça, 49 vjeç, banues në Lushnjë, punonjës policie i IEVP Peqin;

Indrit Dubali, 41 vjeç, banues në Peqin, punonjës policie i IEVP Peqin.