Detaje të reja janë zbuluar lidhur me arrestimin e 26-vjeçarit Shkëlqim Saraçi në Tiranë, i akuzuar për mashtrim në tentativë për t’i marrë 50 mijë euro administratorit të një subjekti privat.
Ai prezantohej si Kryebashkiaku i Tiranës, Erion Veliaj, dhe komunikonte me administratorët e bizneseve përmes aplikacioneve si Signal.
Sipas informacioneve, Saraçi ka kontaktuar një biznesmen përmes mesazheve dhe i ka kërkuar shumën prej 50 mijë eurosh.
Pas kësaj, biznesmeni ka bërë denoncim në Policinë e Tiranës, e cila ka aktivizuar Seksionin Kundër Krimit Ekonomik për të hetuar rastin. Agjentët e policisë kanë udhëzuar biznesmenin për të organizuar një takim me Saraçin.
Duke ndjekur këto udhëzime, biznesmeni ka pranuar t’i japë Saraçit 20 mijë euro në një vend takim të caktuar prej tij, i cili është monitoruar nga policia. Në momentin që Saraçi ka arritur dhe ka marrë paratë, ai është arrestuar në flagrancë.
Njoftimi i Policisë:
Finalizohet një tjetër operacion me objektiv goditjen e përfitimit nëpërmjet mashtrimit, të shumave të konsiderueshme të parave.
Operacioni policor i koduar “Apps” arrestoi në flagrancë një 26-vjeçar, teksa po i merrte administratorit të një subjekti privat, 20000 euro, pas mashtrimit në aplikacione të ndryshme, duke u prezantuar si funksionar i lartë shtetëror.
Punohet për kapjen e organizatorit të këtij rasti, të identifikuar tashmë nga Policia.
Sekuestrohen 20000 euro, 3 celularë dhe 1 automjet.
Sektori për Hetimin e Krimit Ekonomik dhe Financiar në Drejtorinë për Hetimin e Krimit Ekonomik dhe Financiar në Departamentin e Policisë Kriminale, në bashkëpunim me Drejtorinë e Forcës së Posaçme Operacionale, si dhe në drejtimin e Prokurorinë së Tiranës, finalizoi operacionin policor të koduar “Apps”, si rezultat i të cilit u vu në pranga shtetasi Shkëlqim Saraçi, 26 vjeç, banues në Tiranë.
26-vjeçari u kap në flagrancë ndërkohë që po i merrte administratorit të një subjekti privat, të cilin e kishte mashtruar në aplikacione të ndryshme, 20000 euro. Gjithashtu, si rezultat i këtij operacioni u identifikua dhe u shpall në kërkim organizatori i dyshuar i këtij rasti, shtetasi L. D., 24 vjeç.
Gjatë hetimeve ka rezultuar se këta shtetas, duke u prezantuar si funksionarë të lartë shtetërorë, i kanë kërkuar administratorit, 50 000 euro.
Punohet për lokalizimin dhe kapjen e shtetasit L. D., i cili nga verifikimet rezulton se është jashtë shtetit, si dhe vijojnë hetimet për të identifikuar dhe nxjerrë përpara përgjegjësisë penale, shtetasit e tjerë që mund të jenë implikuar në këtë rast.
Materialet procedurale i kaluan Prokurorisë së Tiranës, për veprime të mëtejshme, për veprat penale “Mashtrimi”, me pasoja të rënda, dhe “Përvetësimi i titullit apo detyrës shtetërore”.
gijotina.com/
Discussion about this post