Endri Shabani, përfaqësues i Nismës Thurje, në një intervistë për Ora News, ka kritikuar Gjykatën Kushtetuese për vonesën në marrjen e vendimit për pezullimin e datës së zgjedhjeve për Bashkinë e Tiranës, pas ankimimit të bërë nga kryebashkiaku Erion Veliaj.
“Gjykata Kushtetuese duhej ta kishte marrë këtë vendim që në momentin e parë që pati një ankim,” u shpreh Shabani, duke theksuar se pezullimi i procesit zgjedhor është një hap i ndërmjetëm dhe teknik, i cili nuk kërkon një shqyrtim të thelluar për të vendosur.
Ai kujtoi se, në atë kohë, Gjykata Kushtetuese argumentoi se një vendim i ndërmjetëm nuk ishte i nevojshëm, me arsyetimin se pezullimi ishte automatik pas dorëzimit të ankimimit.
Megjithatë, sipas Shabanit, vonimi për të marrë një vendim formal për pezullimin ka sjellë paqartësi dhe ka dëmtuar procesin.
“Gjykata nuk ka marrë ende një vendim për ta pranuar ose jo ankimin, por vetëm një vendim të ndërmjetëm për pezullimin e çdo afati dhe procesi deri në 31 tetor, kur është caktuar shqyrtimi i çështjes,” sqaroi ai.
Shabani kritikoi edhe faktin se një vendim i tillë, që sipas tij duhej të ishte administrativ dhe i shpejtë, ka marrë tepër kohë, duke u zvarritur pa arsye të qarta.
Discussion about this post