Sekretar i Përgjithshëm i Lëvizjes Socialiste për Integrim, Endrit Braimllari, ka treguar sot gjatë një interviste televizive se kur kanë filluar krisjet e para mes PD dhe LSI. Sipas tij, PD e ka provokuar disa herë LSI para dhe pas zgjedhjeve të fundit parlamentare. Braimllari tha se gjatë fushatës opozita dështoi të krijonte një frymë të përbashkët. Ndër të tjera ai tregoi se, Basha në përfundim të fushatës ka refuzuar që të marrë pjesë në mitingun përmbyllës të LSI. “Është shumë e qartë tani në opinionin publik, nuk pati një frymë fituese në bazë dhe të udhëhequr nga kryetari. Ka pasur provokime LSI nga PD edhe përpara 25 prillit. Nuk na ftoi në mitingun e PD dhe nuk erdhi në mitingun përmbyllës të LSI”, tha ai.
Për çështjen e daljes me një listë të përbashkët, Braimllari u shpreh se nuk ka pasur asnjë diskutim mes PD dhe LSI. “Nuk ka pasur asnjë përpjekje dhe komunikim për listë të përbashkët. Monika Kryemadhi i ka kërkuar Lulzim Bashës të mos tradhtojë frymën dhe aksionin e opozitës”, tha ai. Ndërsa për situatën e sotme të opozitës ai tha se të gjithë po vuajnë pasojat e gabimeve që ka bërë Basha.
Discussion about this post