Enea Karakaçi ka nisur bashkëpunimet oligarkun e karburanteve Shefqet Kastrati, ashtu siç bënte edhe paraardhësi, Ardian Çela. Që kur ka marrë drejtimin e OSHEE, Karakaçi është kujdesur që të bëjë investime në të mirë të vetes. Ashtu ka bërë edhe me tenderin e radhës, që do t’iu kushtojë qytetarëve që paguajnë për energjinë 2 miliardë lekë. Bëhet fjalë për prokurimin me objekt “Blerje karburant Diesel dhe Benzinë për nevojat e OSHEE GROUP sh.a dhe kompanive bija”.
Sipas të dhënave të tenderit do të blihen 915,000 litra naftë dhe 45,000 litra benzinë. Sigurisht është një sasi shumë e madhe dhe kontrata vlen për një vit, pra që në fillim të vitit 2024 u sigurua një kontratë marramendëse që do të vjelë para deri në dhjetor. Ndërkohë në muajt në vijim, Karakaçi mund të zhvillojë tenderë të tjerë për blerje karburanti, sepse këto metoda përsëriten gjithmonë.
Ndërkohë, përveç sasisë së lartë dhe shpenzime të shumta për naftë që në dokumente as nuk sqarohen dhe argumentohen, ajo çka bie në sy në këtë tender është “Flamuri i Kuq”. Open Data Albania e ka listuar këtë tender në prokurimet korruptive për shkak të mungesës së konkurrencës.
Shohim që deri më 10 nëntor 2023, kur ishte edhe afati i fundit, ka paraqitur ofertë vetëm kompania KASTRATI” sh.p.k, një nga tentakulat e ‘oktapodit’ të karburanteve.
Oferta e tij ishte në vlerën 1.6 miliardë lekë dhe pa shumë lodhje u shpall menjëherë fitues.
Duke qenë se është krijuar kartel në tregun e karburanteve, rrjedhimisht Kastrati po krijon një qark të tillë kontrolli edhe tek prokurimet. Kemi vënë re se në çdo tender ai konkurron i vetëm, edhe pse kjo skemë bie në kundërshtim të hapur me rregullat më kryesore të ligjit “Për prokurimet publike”. Asnjë ent publik nuk i thotë ‘jo’ kërkesës së Kastrati.
Madje nuk është aspak çudi që edhe vlerat e tenderëve t’i vendos vetë Çeti.
Në këtë mënyrë Kastrati na vërtetoi se vazhdojnë pazaret njësoj si me kohën kur ishte Çela në krye të OSHEE.
Ndërsa OSHEE-së po i shton çdo muaj nga një ‘Flamur të kuq’ trofeve të korrupsionit, me sa duket Karakaçi harron që ky është një alarm i kuq, që mund ta dërgojë në dyert e SPAK. Në fakt me këto dokumente, Prokuroria e Posaçme nuk do të duhet të humbasë më kohë me hetime të gjata!
Lexo edhe: Karakaçi në “luftë” me hakerat: 2.5 MLD lekë “mbrojtja” e OSHEE, denoncohen 2 tenderat
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post