Rritja e çmimit të energjisë ka qenë kryefjala e këtyre ditëve, për shkak të krizës që mungesa e blerjes së saj pritet të shkaktoj. Teksa tanimë bursat kanë arritur nivel rekord, rezulton se FTL (Furnizuesi i Tregut të Lirë) pjesë e OSHE Group, vetëm përgjatë muajit tetor ka paguar rreth 65 milion me të cilat supozohej sigurimi i energjisë së nevojshme për konsum.
Për të llogaritur shpenzimet e kryera nga FTL, mjafton të shohim procedurat gjatë periudhës 4-31 tetor. Këto procedura janë shtrirë në tre faza, por megjithatë as ky fakt nuk ka mjaftuar për të siguruar sasinë e kërkuar të energjisë.
Nga 4 tetori deri në 31 tetor janë blerë në treg të lirë mbi 237 mijë MWh energji, që do të thotë se çmimi mesatar me të cilën është siguruar një megavat/orë është rreth 273 euro/ MWh.
Përpara kësaj situate ku vetë kryeministri Edi Rama shpalli gjendjen e emergjencës në 8 tetor dhe theksoi se do të ketë pezullim investimesh në sektorin energjetik nga të tre operatorët dhe fokusimi i tyre tek sigurimi i energjisë për konsum deri tek vendosja në dispozicion të instrumenteve financiarë për OSHEE-në, duket se kjo e fundit nga 100 milionë të vëna në dispozicion për blerje energjie, 65% të këtij fondi e ka konsumuar vetëm në muajin tetor.
Teksa çmimi në bursa vijon të mbetet i lartë Shqipëria dy muajt e mbetur të vitit duhet të shpresoj në përmirësimin e situatës hidrike në vend nga reshjet.
Kjo krizë që ka prekur mjaft vende të globit si shkak e faktorëve kompleks që e shkaktuan atë, sipas ekspertëve pritet që të zgjasë rreth dy vite.
