Në një intervistë për mediat, nënkryetarja e PD-së, Jorida Tabaku e cilëson inceneratorin e Elbasanit, si një prej shkeljeve më të mëdha nga ana procedurale. Tabaku tha se dy inceneratorët e tjerë, ajo e Fierit dhe e Tiranës, kanë shkelje më së shumti financiare.
Nënkryetarja e PD-së, deklaroi se për inceneratorin e Elbasanit, ka ndërhyrë Engjëll Agaçi i cili sipas saj ka përshpejtuar çdo procedurë. Më tej, Tabaku shprehet se Agaçi ka vendosur Këshillin e Ministrave në funksion të kompanisë së inceneratorit dhe ka tejkaluar kompetencat të cilat nuk i takonin këshillit të ministrave.
“Unë e kam të pamundur të merrem ne z. Lefter Koka, për sa kohë është përpara drejtësisë dhe do të fokusohem te personat e tjerë që janë të përfshirë. Inceneratori i Elbasanit, nga pikëpamja e procedurës është shkelja më e madhe ndër të tre, ndërkohë që Fieri dhe Tirana kanë shkeljet financiare më të rënda. Inceneratori i Elbasanit i ka kryer të gjitha procedurat në 40 ditë, dhe z. Agaçi është përgjegjës për përshpejtimin e çdo procedure, për vendosjen e Këshillit të Ministrave në funksion të kompanisë së inceneratorit dhe ka tejkaluar kompetencat të cilat nuk i takonin këshillit të ministrave. Këshilli i Ministrave nuk ka pse të miratojë çështje financiare të inceneratorit. Ministria e Financave i bën i kanë bërë për mburojë, për të hequr përgjegjësinë individuale e për ta bërë përgjegjësinë kolektive. Z.Agaci është përgjegjësi sepse ka marrë 17 vendime në këshillit të ministrave brenda 10 ditësh, është përgjegjës sepse ka ngritur të gjithë qeverinë në këmbë që kjo kontratë të firmosej në kohë rekord. Ndërkohë që nga pikëpamja e procedurave, sekretari i përgjithshëm i ministrisë së Mjedisit, Alqi Bllako ka qenë ai që ka qenë i përfshirë në procedura, që i është dhënë një kompanie e krijuar nga asgjëja, e një vajze 27 vjeçare, me 1 mln lekë llogari bankare dhe kapital. Pa pasur asnjë njohur për menaxhimin e mbetjeve, një koncension prej 24 mln eurosh. Kanë marrë një kredi në bankë për ta mbuluar inceneratorin dhe kanë mbuluar kredinë me fonde të taksa paguesve shqiptarë” – tha Tabaku.
Kujtojmë se ditën e djeshme, komisioni hetimor për inceneratorët zbriti në terren ku pa nga afër landfillin e Tiranës dhe konstatoi që nuk kishte incenerator në Sharrë.
Discussion about this post