Ish-gjyqtarja Enkelejda Hoxha është paraqitur mëngjesin e sotëm në KPA për të ankimuar vendimin e shkarkimit nga detyra dhënë nga Këshilli i Lartë Gjyqësor që i hoqi statusin e magjistrates.
Hoxha u arrestua me urdhër të SPAK në shkurt të këtij viti pasi akuzohet për korrupsion. Ishte ky institucion që kërkoi dënimin e saj me tre vite e gjysmë burg.
Ish-gjyqtarja ndodhet në burg që prej 11 shkurtit, bashkë me 9 persona të tjerë, në kuadër të një operacioni të SPAK, pasi ishte vënë në përgjim prej muajsh. Pikërisht më 11 shkurt, Hoxha, me skemën e përgatitur me ndihmën e bashkëpunëtorëve të saj, do të lironte të dënuarin për vrasje, Saimir Petani.
Hoxha akuzohet se ka marrë shuma nga 6 mijë deri në 12 mijë euro në këmbim të lirimit të të dënuarve për vrasje. Në skemë u zbulua edhe mjeku kardiolog Edvin Prifti pasi nga përgjimet rezultoi se kishte marrë ryshfet për të operuar në QSUT nënën e sekretares së gjykatës, Manuela Mallkuçi, por ai u la i lire në seancën e Apelit më 2 mars.
Discussion about this post