Enkileda Carja është shpallur Kampione e Europës në Peshëngritje për të Rinj dhe U23.
Peshëngritësja shqiptare dominoi garën duke siguruar vendin e parë dhe medaljen e artë, ndërsa në ceremoninë e ndarjes së çmimeve mori edhe certifikatën e rekordit për paraqitjen e saj.
Sportistja e Kombëtares Shqiptare ka bërë një garë të shkëlqyer në Kampionatin Europian të Peshëngritjes për të Rinj dhe U23, që po mbahet në Durrës. 17-vjeçarja që garon në peshën 63kg e nisi garimin e saj me peshën 95kg në shkëputje, duke vendosur rekordin e ri për moshat. Në provën e dytë Carja ngriti 96kg dhe në të tretën 98kg, duke siguruar vendin e parë dhe duke e thyer 3 herë rresht rekordin e shkëputjes.
Në stilin e shtytjes Enkileda Carja bëri një garë me veten, krejtësisht e shkëputur nga kundërshtaret e saj, duke e thyer 3 herë të tjera rekordin e shtytjes, me 113kg, 116kg dhe 118kg. Në total, Enkileda Carja ngriti 216kg, duke vendosur edhe këtu rekordin e ri të Europës.
Talenti i jashtëzakonshëm dhe puna e shkëlqyer me trajneren e përkushtuar Englantina Kalemi, e kanë ngritur Enkileda Carjen në majat e Peshëngritjes, duke dominuar në të gjitha pedanat Botërore dhe Europiane për moshat.
gijotina.com/
Discussion about this post