Entet publike vazhdojnë të bëjnë kërdinë me buxhetin e shtetit dhe të japin performancë të dobët në mbledhjen e të ardhurave dhe menaxhimin e fondeve. Neglizhenca dhe abuzimi i tyre ka bërë që të rrisin borxhet me 2 miliardë lekë në 10 muaj, duke e çuar stokun e detyrimeve të prapambetura në nivelin e 21 miliardë lekëve. Sipas të dhënave të raportuara nga Ministria e Financave, kjo është një rritje e marramendëse, po të marrim në konsideratë që këtë vit ekonomia u hap dhe institucionet filluan aktivitetin normal.
Konkretisht, nga janari në tetor detyrimet e prapambetura nga entet publike u rritën me 10%, pasi në fund të dhjetorit 2020 ato regjistroheshin 19 miliardë lekë. Më tutje ministria tregon se borxhet e institucioneve publike kanë pësuar rritje të ndjeshme krahasuar edhe më të njëjtën periudhë të 2020-ës. “Nga tetori i vitit 2020 detyrimet e prapambetura ( të cilat nuk përfshijnë detyrimet që rrjedhin nga gjykatat ndërkombëtare) gati janë dyfishuar. Nga 12 miliardë që ishin vjet në tetor ato rriten në harkun kohor të një viti gati me 80%”, thuhet në raportin e MFE.
Ministria e Infrastrukturës, problematike
Nga të dhënat e publikuara, evidentohet se shirat më të larta të borxhit i regjistron Ministria e Infrastrukturës. Konkretisht, detyrimet e prapambetura nga ky sektor janë rritur me 144 % në krahasim me fundit e vitit 2020, duke arritur vlerën e 12,3 miliardë lekëve (100 mln euro) në fund të tetorit 2021 nga rreth 5 miliardë lekë që ishin në fund të vitit 2014. Sipas Ministrisë së Financave, borxhet në infrastrukturë u rritën për shkak se janë lënë pa paguar faturat e shërbimeve të marra.
“Teksa detyrimet e TVSH, të cilat përbenin më shumë së gjysmën e stokut të detyrimeve ranë në mënyrë të dukshme, por është rritur zëri “detyrime të tjera”, i cili shkoi në 9,1 miliardë lekë nga 5.8 miliardë leke qe ishte në vitin 2015. E gjithë rritja e detyrimeve të prapambetura erdhi nga akumulimet e faturave ndaj punëve të pashlyera në infrastrukturë”, thuhet në raport. Po ku i dërgoi MIE paratë e marrë, duke qenë se është një nga institucionet më të privilegjuara, pasi edhe në kohë pandemie ka kërkuar dhe ka arritur të marrë fond shtesë, edhe për numrin e lartë të koncesioneve që ka.
Sakaq, vlen të theksohet se, shuma e detyrimeve të prapambetura që nuk reflektohen në borxhin publik por që janë fatura që qeveria shqiptare duhet ti paguajë arrin në 547 milionë euro, nëse përfshihen edhe vendimet e gjykatave të huaja.
Discussion about this post