Përveçse shërben si vend tranzit për drogat e forta, Shqipëria ndryshe njihet edhe si një strehë në zgjerim për përdoruesit e tyre. Kokaina klasifikohet ndër lëndët narkotike të luksit, edhe për shkak të çmimit të saj të lartë.
Raportuesja për Shqipërinë në Evropë për përdorimin e lëndëve narkotike, mjekja toksikologe Esmeralda Thoma, e veçon përdorimin e kokainës duke e kategorizuar me fjalët, epidemia e re.
“Momentalisht dhe për vendin tonë dhe për SHBA dhe Europën Perëndimore po flitet të paktën këto 3-4 vitet e fundit, po flitet për një epidemi kokaine, pra përdorimi i kokainës është aq i shprehur aq në shifra të larta, tashmë në këto vende po flitet për epidemi kokaine” – deklaron znj. Thoma.
Ndarja e qyteteve sipas përdorimit të lëndëve narkotike, fillon nga Fieri dhe Elbasani që dominojnë shpërndarja dhe konsumimi i heroinës. Ndërsa Tirana dhe Durrësi kanë kokainën lëndë të parë konsumi. Le të shohim edhe zonat më problematike në Tiranë.
“Zonat nuk është se janë të ndara të prera me thikë. Pothuajse në të gjithë territorin e Tiranës ka konsumim të lëndëve narkotike. Zonat që kanë më shumë fluks ka qenë zona e parkut që u godit. Ka qenë zona e pallatit me shigjeta, ka qenë zona e bllokut, por që edhe aktualisht dominon për përdorimin në fundjavë të lëndëve narkotike të llojit kokainë. Zona e Freskut, Alliasi dhe Kamza” – është shprehur Maringlen Beqo, shef i Antidrogës në Tiranë.
Pavarësisht çmimeve shumë të larta për blerjen e kokainës, ajo shitet në masë. Çmimi i kokainës varion sipas cilësisë së saj, ndërsa tregtia nis nga blerja me kilogramë e përfundon deri tek blerja sipas dozave.
“Kemi 2 lloje kokaine, kemi kokainë peruanë dhe fleks. Çmimi i një kilogram peruanë varion nga 35 deri në 40 mijë euro. Ndërsa i fleksit kalon në 28 deri në 35 mijë euro për kilogram, me shumicë flas gjithmonë” – tregon Maringlen Beqo, shef i Antidrogës në Tiranë.
Në Shqipëri nuk është vetëm Porti i Durrësit pikë kyçe e futjes së lëndëve narkotike, ndërsa kokaina që hyn në Shqipëri nuk vjen në cilësinë e vendit të origjinës. Kjo pjesë që vjen merret, përpunohet dhe më pas shpërndahet në doza.
