Dinamo ka nisur nga dje përgatitjet në tokën italiane ose e thënë ndryshe epokën “Di Biaxho”.
Trajneri i njohur nga Roma është bashkuar për herë me skuadrën e re në zonën e Karpenjës në Itali, aty ku blutë do të stërviten intensivisht për afro dy javë.
Ledian Memushaj, Fabricio Pikareta, Korrado Sakone dhe Blendi Baholli do të jenë ndihmësit e Luixhi Di Biaxhos në stafin e ri të Dinamos, që ka nisur tashmë zyrtarisht punën.
“Panorama Sport” ka raportuar ditë më parë që ish-mesfushori i Kombëtares ka rënë dakord për të qenë krahu i djathtë i Di Biaxhos, por ky i fundit ka preferuar që të ketë në staf edhe një emër të njohur të trajningut në Itali, pikërisht Pikaretën, i cili së fundmi ka bashkëpunuar me trajnerin e ri të Dinamos te Spali.
57- vjeçari Pikareta ka një eksperiencë të madhe, pasi ka punuar më parë në stafin e Interit, Romës dhe Sampdorias në Itali, Sandërlendit në Angli, Olahenses në Portugali, Inter Turkut në Finlandë, si dhe në rolin e skautit për llogari të Federatës italiane të futbollit.
Ndërsa Memushaj vjen pas eksperiencës me të rinjtë e Peskarës dhe kjo është hera e parë që do të punoj në Shqipëri si trajner. Nga stafi i ish-trajnerit Dritan Mehmeti ka mbetur përgatitësi atletik italian, Sakone, i cili më parë ka punuar te Partizani, por gjithashtu te Napoli kur drejtonte Ançeloti.
Gjithashtu edhe trajneri i portierëve, Baholli, ka qenë në fazën përgatitore të Dinamos në Pogradec, ndërsa së fundmi është përfolur se mund të rikthehet Ilir Bozhiqi.
KONTRATA – Ish-trajneri i Italisë U-21 dhe Spalit në Serinë A, bashkë me ndihmësit e tij, mësohet se kanë firmosur për dy vjet me klubin e Dinamos. Me projektin e ri “Dinamo City” hapet një faqe e re për klubin kryeqytetas, që synon rikthimin e fuqishëm në majat e futbollit shqiptar. Me tre aksionerët e rinj që i janë bashkuar presidentit Bardhi, buxheti është rritur ndjeshëm.
Gazeta mëson se stafi i ri pritet t’i kushtojë Dinamos rreth 300 mijë euro në total. 180 mijë në sezon do të marrë vetëm trajneri Di Biaxho, ndërsa pjesa tjetër do të shpërndahet në rroga të ndryshme për stafin.
Shifra vërtet shumë të larta për futbollin shqiptar, ndërkohë që edhe merkatoja duhet t’i përgjigjet këtij niveli. Pasi pa skuadrën në ndeshjen miqësore me Skënderbeun, Di Biaxho ua ka bërë të qartë drejtuesve se çfarë duhet të bëjnë.
Puna ka nisur për të konkretizuar fillimisht afrimin e katër lojtarëve me peshë, me shumë mundësi do të jenë të huaj. Klubi dhe drejtori i ri sportiv, Haris Fakiç, tashmë janë në luftë me kohën.
Discussion about this post