Moti i keq i shoqëruar me erëra të forta ka shkaktuar dëme të konsiderueshme në parkun ujor të Drilonit, në Pogradec. Gjatë orëve të natës, disa pemë të vjetra janë rrëzuar.
Kjo nuk është hera e parë që pemët në këtë zonë dëmtohen për shkak të moshës së tyre dhe kushteve atmosferike të pafavorshme. Situata e ngjashme është raportuar edhe më parë në parkun e qytetit të Pogradecit.
Ndërmarrja e parqeve ka ndërhyrë menjëherë për të larguar pemët e rrëzuara dhe për të kryer verifikime të hollësishme, me qëllim identifikimin e pemëve të tjera të rrezikuara nga mosha e madhe qe mund te rrezohen nga kushtet klimatike.
Specialistët apelojnë për marrjen e masave të duhura për të mbrojtur parqet natyrore nga dëmtimet e përsëritura, duke garantuar kështu sigurinë e vizitorëve dhe mirëmbajtjen e zonave të mbrojtura.
Ndërkaq, 1135 familje janë pa energji elektrike në juglindje të vendit. E gjithë kjo situatë është krijuar për shkak të erave të forta dhe linjave të amortizuara në zonat e thella malore.
Pa energji elektrike janë fshatrat Shipskë e Krushove në njësinë administrative Vithkuq ndërkohë që pa energji elektrike janë edhe 300 familje në njësitë administrative Propotisht, Velçan e Trebinjë në bashkinë e Pogradecit.
Edhe në bashkinë e Kolonjës, fshatrat e Mollasit dhe Rehovës kanë probleme me energjinë elektrike, ndërsa në Devoll problemet me të theksuara janë në Vranisht, Baban e Stropan.
Burime zyrtare pranë drejtorisë rajonale të OSSHE bëjnë të ditur se grupe pune te kësaj drejtorie janë në terren duke punuar për rikthimin e energjisë elektrike.
Discussion about this post