“Erdhën për të na vrarë në PD”, Kapllanaj: Përjashtimet i bëri Kryesia, jo Basha

Në një intervistë për mediat, anëtari i Kryesisë së PD-së Agron Kapllanaj, u shpreh se përjashtimet nuk janë bërë nga Basha, por nga Kryesia e partisë. Kapllanaj tha se ndaj personave që kanë ushtruar dhunë është marrë një masë e tillë dhe që erdhën në selinë e PD-së për t’i vrarë ata brenda.

“Përjashtimet nuk janë bërë nga Basha, por nga Kryesia e partisë. Vendimi është marrë nga kryesia, një institucion legjitim që shqyrtoi situatën dhe protestën e dhunshme, me njerëz që erdhën të na vrisnin brenda në parti. Ndaj personave që kanë ushtruar dhunë është marrë një masë e tillë. Nuk shoh ndonjë gjë për tu çuditur këtu. Ne kemi përjashtuar njerëz që erdhën aty për të na vrarë dhe për të shkatërruar selinë e PD-së” – u shpreh Kapllanaj.

Kujtojmë se në mbledhjen e djeshme të Kryesisë së Partisë Demokratike është marrë vendimi për përjashtime dhe pezullime për deputet dhe drejtues të Partisë Demokratike, që i janë bashkuar aksionit të Berishës, me arsyen se kanë qenë iniciues të dhunës në protestën e 8 janarit.