Kryeministri Edi Rama ka reaguar përmes një shkrimi të gjatë në rrjetet sociale lidhur me vizitën e presidentit turk në Shqipëri, si edhe akuzat se po priste Erdogan në ditën që përkonte me 554- përvjetorin e vdekjes së heroit kombëtar Gjergj Kastrioti Skënderbeu.
Rama thotë se përkimi i datave ishte rastësi, duke shtuar se ai nuk ka lidhje me rrethimin e Krujës pasi Turqia ka firmosur me Shqipërinë “Marrëveshjen e Miqësisë së Përjetshme” 100 vite më parë.
“Dje, duke komentuar vizitën e presidentit të Republikës së Turqisë, disa miq këtu nuk u kursyen në sharje e në mallkime “në emër të Skënderbeut”! Rastësia e desh që vizita e djeshme të përkonte me ditën e vdekjes së Heroit tonë Kombëtar, çka e mësuan me këtë rast plot prej atyre të cilët rendin t’i fryjnë zjarrit të patriotizmit digjital apo opozicional, që ndizet sa herë unë takohem me “pushtuesin” nga Ankaraja”, tha Rama.
Kryeministri e cilëson Turqinë si mike të sprovuar të vendit tonë duke kujtuar rastin e ardhjes së vaksinave në një kohë kur thotë se Ballkani mbeti si “peshku pa ujë” nga pandemia.
Discussion about this post