Enti Rregullator i Energjisë (ERE) kaloi në analizë së fundmi investimet e vitit 2020 kryer nga Operatori i Sistemit të Transmetimit duke miratuar në finale edhe tabelën përfundimtare të tyre.
Në total për vitin e kaluar sipas ERE investimet e OST llogaritën në 3.5 miliardë lekë dhe një pjesë e tyre janë ende në vazhdim ndërkohë që ka të tjerë që duhet të riskedulohen për t’u vazhduar në vitet në vazhdim.
“Bordi i ERE-s, vendosi miratimin e planit të investimeve të shoqërisë OST sh.a., për vitin 2020, në vlerën 3.6 mld lekë.
OST sh.a., të përditësojë pjesën e mbetur të planit 10 vjeçar për periudhën 2015-2025, të miratuar me vendimin e bordit të ERE-s nr. 212, datë 28.12.2017, sipas kritereve të përcaktuara në “Rregulloren e procedurave të paraqitjes dhe miratimit të planit të investimeve nga operatorët e transmetimit dhe shpërndarjes së energjisë elektrike”, miratuar me vendimin e bordit të ERE-s nr. 135, datë 06.09.2017 dhe të raportojë në ERE për realizimin e investimeve të vitit 2020, brenda 3 muajve nga hyrja në fuqi e këtij vendimi” nënvizon ERE.
I njëjti vendim sqaron edhe mënyrën sesi janë ndarë investimet sipas financimit në kuptimin e fondeve të vetë operatorit, financim i huaj apo grante. Bëhet fjalë për investime që janë nisur më herët sesa viti 2020 dhe që kanë kohëzgjatje me më shumë se një vit.
Kështu vlera totale e investimeve parashikuar nga OST sh.a. për t’u realizuar në vitin 2020, me financime të huaja ishte 1.4 mld lekë, (për t’u disbursuar nga kreditë) dhe investime për t’u financuar nga OST sh.a. si kosto lokale në vlerën 91 miln Lekë, si dhe grante 72.3 mln Lekë. “Këto investime janë në proces realizimi nga OST sh.a. dhe përgjatë vitit 2020 pasi janë projekte të miratuara nga ERE në vitet respektive. ERE ka dhënë miratimet përkatëse për këto investime/projekte në miratimin e planeve të investimit të OST sh.a. në vitet e mëparshme. OST sh.a., të vijojë me realizimin e tyre dhe të raportojë periodikisht në ERE mbi ecurinë e realizimit të tyre”
Janë të paktën nëntë projekte që sipas ERE edhe pse kanë qenë në tabelën e investimeve për vitin 2020 nuk ka nisur as procesi i zbatimit dhe as janë në fazë prokurimi. Të tilla janë instalimi hardware dhe implementimi logjikës PLC mbi menaxhimin e LFC në lidhje me sistemet lokale të kontrollit të përdoruesve të rrjetit të OST sh.a. me vlerë 12,9 milionë lekë.
Integrim i dy trakteve 220 kV në nënstacionet Elbasan 1 dhe Elbasan 2 (trakti i TR2 dhe trakti i Kurum) me vlerë 11,9 milionë Lekë. Po kështu integrimi i linjave të interkonjeksionit nga ËAMS në modulin e rregullimit sekondar me vlerë 5 milionë Lekë.
Përmirësimi i infrastrukturës qëndrore, platformat dhe sistemeve TI, me vlerë 15 milionë Lekë si dhe sistem i matjes online, me vlerë 8 milionë Lekë. Sistem për menaxhimin e projekteve dhe detyrave, me vlerë 6,5 milionë Lekë. Hostim dhe Anycast për website dhe ndërfaqësim me platformat kryesore të OST sh.a., me vlerë 2,5 milionë Lekë. Instalimi i trosit OPGË në linjën 154 Kv Bistricë-Kufi, pa vlerë financiare në tabelën ku jepet vlera e Investimit. Furnizimi, instalimi dhe konfigurimi i 2 sistemeve online të izolatorëve dhe shkarkimeve pjesore TR e fuqisë AT1 dhe AT2 në n/st 220/110/10 kV Burrel, pa vlerë financiare në tabelën ku jepet vlera e investimit.
