Ish-zv. kryeministri Erion Braçe ka dorëzuar ditën e sotme përfundimisht detyrën dhe këtë e bëri të ditur me anë të një videoje të publikuar, me pamjet nga largimi i tij nga zyra që mbante në Qeverinë ‘Rama 2’.
Nëpërmjet një postimi të gjatë në facebook, Erion Braçe thekson se është mbyllur marrëdhënie në qeveri, madje ka publikuar dhe një video me karrigen e zyrës të kthyer përmbys!
Në mesazhin e tij, Erion Braçe thekson se nuk hyri si hajdut në qeveri dhe nuk doli si hajdut prej saj.
“NUK HYRA SI HAJDUT, NUK DOLA SI HAJDUT! Ne 2 vite e gjysmë kuptova që e gjitha është çështje vullneti, të vjedhësh ose jo, të lejosh të vjedhin ose jo; patjetër çështje drejtësie. SOT ESHTE NJE DITE TJETER, E RE AQ SA LEJON PERVOJA E GJATE NE KUVEND TE JETE E TILLE; POR JAM NE HABITATIN TIM AMA!” – shkruan Braçe.
Braçe gjithashtu thekson se këtë post në qeveri nuk e ka dashur kurrë dhe se marrja e kësaj detyrë iu kërkua. Ai më tej thotë se ndonjëherë ndihej si drejtor gjimnazi që rri në dezhurn, dhe se ka qenë i kufizuar në shumë veprime për shkak të Kodit të brendshëm të Etikës.
“Të premten që shkoi puna ime në qeveri u mbyll; marrëdhënia e krijuar nga dëshira për t’i shërbyer njerëzve në atë nivel mbaroi; Mbase edhe më herët, qyshkur u kufizua në limitet e rutinës që herë më ngjante me dezhurin në gjimnaz dhe, herën tjetër me detyrimin për të respektuar një kod etike me marrëdhënie brenda. Një përvoje e çuditshme pushteti, përvoje karrigeje, e komplikuar, që as e doja e as e kërkova -ma kërkuan, as e pranova si të tillë e as më pranoi” – shkuan Braçe, i cili më tej falënderon të gjithë bashkëpunëtorët e tij gjatë detyrës si zv. kryeministër.
Erion Braçe dha dorëheqjen nga posti i zëvendës kryeministrit në datën 25 gusht të këtij viti. Dorëheqja e tij u pasua me kritika që bënte në rrjetin social facebook, ku la të kuptohej se informacionin e shkarkimit e kishte marrë para kohe dhe për këtë dha dorëheqjen para kohë.
