“Erion, herën tjetër voton nga qelia”, debatet në Këshillin Bashkiak

Ka nisur me debate dhe replika mbledhja e Këshillit Bashkiak të Tiranës, ku i pranishëm është edhe kryebashkiaku Erion Veliaj.

Mbledhja, sipas Dorian Telitit, këshilltarit të opozitës, ka nisur me shkelje për shkak se këshilltarëve opozitarë iu është mohuar e drejta e fjalës nga Romina Kuko, kryetare e Këshillit bashkiak, dhe Erion Veliaj.

“E kërkuam fjalën për procedurë, një e drejtë e çdo këshilltari, por dyshja nuk dëshiron të dëgjojë të vërtetën në sy. Nuk duan të degjojnë të vertetat e vjedhjes së fondeve dhe grabitjes së pronës publike.

Shkelje pas shkelje, kjo është fytyra e vërtetë e Bashkisë”, shkruan Teliti në rrjetet sociale.

Ndërkohë gjatë debatit, këshilltari Endrit Braimllari duke iu drejtuar Veliajt i tha “herën tjetër ti do votosh nga qelia. Je shkelësi më i madh i ligjit në Tiranë. Procedurat e inceneratorit janë personale për të gllabëruar qytetarët. Ti je hajduti më i madh i qytetarëve të Tiranës”.

Por Veliaj në replikën e tij tha se në 2025 është përballja tjetër elektorale dhe opozita do e shohë sa vota do të marrë.

Ndërkohë këshilltari Tedi Blushi duke iu drejtuar Kryebashkiakut të Tiranës e quajti Erion Qelia.

“Ti sot i sjell Këshillit Bashkiak për miratim propozimin për shtesë fondesh për inceneratorin inekzistent dhe nën sekuestro të Tiranës.

Në vend të ishe sot i pandehur para drejtësisë vjen bën monologje para Këshillit.

Je keqbërësi më i madh i kryeqytetit dhe abuzuesi më i madh i taksave të qytetarëve.

Për mega-aferën e inceneratorit duhet të ishe marrë i pandehur. Ti sot quhesh Erion Qelia”, tha Blushi.