Erion Veliaj vazhdon të hapi “thesin” për miqtë e përhershëm të bashkisë duke akorduar 279 milionë lekë të vjetra pa TVSH, për të njëjtin shërbim, për të njëjtën kompani, Gerard-A shpk.
Në tenderin me numër REF-19453-02-11-2022 për “Sherbime Pastrimi i Koshave Dekorative” nga Drejtoria e Përgjithshme e Pastrimit dhe Gjelbërimit ka marrë pjesë në garë vetëm një kompani, “GERARD-A SHPK”, e cila duke mos pasur asnjë konkurrent tjetër, është shpallur fituese.
Pra, Bashkia Tiranë jep 221 mijë euro duke mos respektuar parimin e konkurrencës. Për këtë arsye, ky tender futet në kategorinë e flamurit të kuq nga “Open Data” me mbishkrimin e mungesës së konkurrencës.
Disa javë më parë, e njëjta drejtori zhvilloi tenderin me numër REF-17769-01-25-2022 me ofertën fituese 270 milionë lekë të vjetra për të njëjtin shërbim për Gerard-A shpk me mungesë konkurrence. Për të rregulluar disa kosha plehrash dhe stola publik, Veliajt i duhen 270 milionë, shumë e cila me shumë mundësi mund të tepronte për rregullimin e koshave dhe stolave të të gjitha bashkive në vend dhe jo vetëm në Tiranë.
Nga kërkimet tona për Gerard-A shpk në “openprocurement.al”, rezultoi se të gjithë tenderat problematikë ose me flamur të kuq kompania i ka fituar tek bashkia Tiranë. Konkretisht bashkia i ka dhënë kësaj kompanisë 12 tendera të dyshimtë të cilët kapin vlerën e 3 miliard lekëve.
Kryetari i bashkisë vazhdon të “injorojë” krizën e qeverisë për të shkurtuar shpenzimet, madje ambiciet e Veliaj gjenden në vështirësi sepse kryeqyteti ka projekte me vlerë të lartë të papërfunduara. Nëse kriza energjitike rëndohet, kryeministri Rama me shumë mundësi do të shkurtojë projektet e qeverisë për Tiranën të cilat do të rëndojnë imazhin e Veliaj si kryetar i bashkisë pasi sipas raportit të fundit të “Co Plan” ajri ndotet nga kantierët e ndërtimit.
Discussion about this post