Kryebashkiaku i Tiranës është lëshuar pa frena mbi paratë e arkës së bashkisë. Madje po boshatiset buxheti edhe për të ardhmen, pasi tenderat e fundit kanë afatin për 3 vjet dhe marrin fonde nga buxheti afatmesëm.
Konkretisht, Erion Ve;liaj ka autorizuar procedurën e prokurimit për kancelari financuar me programin buxhetor afatmesëm 2024-2026 dhe detajimin e buxhetit të Bashkisë së Tiranës për vitin 2024.
Afro 600 milionë lekë është fondi që kalon në favor të dy kompanive, njëra me pronare Vilma Nushin dhe tjetra me pronarë Gëzim Dobi dhe Frederik Prodani. Për të kënaqur këtë grup biznesmenësh tenderi, jo vetëm është fryrë në këtë vlerë të madhe, por janë bërë manipulime që çuan në lidhjen e kontratës me ofertën më të shtrenjtë.
Bashkia blen 500 mijë zarfa!
Bëhet fjalë për tenderi me objekt “Blerje Materiale Kancelarie 2024” me fond limit 49 993 773,00 lekë ose 600 milionë lekë përfshirë TVSH. Kohëzgjatja e kontratës është parashikuar 36 muaj dhe artikujt duhet të dorëzohen në magazinën e Bashkisë Tiranë, përgjatë periudhës kohore tre vjet, sipas kërkesave dhe nevojave të Autoritetit Kontraktor.
Lista me 114 artikuj kancelarie që kërkon Erion Veliaj të lë të habitur, jo vetëm për gamën, por edhe për sasinë.
Kështu, porosia ndër të tjera ka “stilolaps rapidograf, me majë të hollë, ngjyra e bojës të jetë blu e lehtë. Të mos zbehet dhe të mos lëshojë njolla. Kërkohen 6 000 copë stilolapsa të tillë. 6,000 copë lapsa me gomë, 1500 goma për laps dhe bojë.
Kapëse aktesh duhen 18,000 copë. Zarfa të llojeve të ndryshme do të furnizohen 500 mijë copë.
Këto sigurisht që nuk përdoren në këto sasi kaq të mëdha, por shërbejnë për të justifikuar fondin limit.
Tenderi me “Flamur të kuq”
Tenderi është një skandal që fillon me injorimin e ofertave më të ulëta, skualifikimin e tyre dhe shpalljen fituese të propozimeve më të shtrenjta. Open Data Albania e ka evidentuar këtë tender për shkeljet. “Skualifikim i të gjithë operatoreve konkurrues, përveç fituesit/ Skualifikim i ofertës me vlerën më të ulët”, theksohet në krah të dokumentit të tenderit.
Siç shihet në dokumentin më sipër, tenderi është vlerësuar me “Flamur të kuq”, që është shenja e riskut të korrupsionit.
Nga publikimi në agjencinë e prokurimeve mësojmë se në këtë tender aplikuan 4 kompani. “Infosoft Office” shpk, propozoi 49,293,920 l;ekë pa TVSH.
“Librari Dyrrahu” shpk, kishte çmimin total të ofertës pa TVSH 37,000,000 lekë dhe duke përfshirë tatimin shkonte në 44,400,000 lekë.
“Marketing&Distribution” sh.a, ofroi ta bënte furnizimin me 48,438,000 lekë ose 58,125,600 lekë, duke përfshirë TVSH.
Ndërsa “Office Center” shpk ka dhënë ofertën 42,316,300 lekë.
Për dy propozimet ekonomike u gjetën kleçka dhe kompanitë janë skualifikuar nga komisioni i vlerësimit qysh në fillim. Kështu i është lanë rruga e hapur që të firmoset kontrata me dy ofertat e shtrenjta. Kompanitë “Marketing & Distribution” sh.a dhe “Infosoft Office” shpk janë shpallur fituese megjithëse nuk janë paraqitur si bashkim operatorësh.
Kompani “Marketing & Distribution” sh.a është e oligarkes së shëndetësisë Vilma Nushi, që me sa duket e ka krijuar këtë kompani për të përfituar likuiditete shtesë nga tendera të tillë.
Dhe Lali Eri menjëherë e ka autorizuar firmosjen e kësaj kontrate, sepse Vilma Nushi është pjesë e zinxhirit të korrupsionit me paratë e buxhetit.
Kujtojmë se Prokuroria e Posaçme sqaroi së fundmi se hetimet kishin gjetur prova për të paktën katër akuza ndaj Erion Veliajt.
“Nga provat e grumbulluara, është arritur në konkluzionin se ekzistojnë të dhëna konkrete, të cilat lidhen jo vetëm me veprën penale të parashikuar nga neni 260 i Kodit Penal (korrupsioni pasiv), por edhe me veprat penale: “Korrupsion aktiv i funksionarëve të lartë shtetërorë ose të zgjedhurve vendorë” i parashikuar nga neni 245, “Pastrimi i produkteve të veprës penale ose veprimtarisë kriminale” parashikuar nga neni 287/2 i Kodit Penal dhe “Refuzim për deklarim, mosdeklarim, fshehja ose deklarimi i rremë i pasurive, interesave privatë të personave të zgjedhur dhe nëpunësve publikë, ose i çdo personi tjetër që ka detyrim ligjor për deklarim” parashikuar nga neni 257/a, paragrafi 2 i Kodit Penal”, thuhet në deklaratën e SPAK.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post