Gazetarja Klodiana Lala, ka qenë e ftuar në emisionin “Të Paekspozuarit” ku ka dhënë detaje nga takimi informal i kreut të SPAK, Altin Dumani, me gazetarët.
Lala tha se Dumani u pyet se përse Erion Veliaj nuk është në mesin e të arrestuarve për çështjen e inceneratorit të Tiranës. Kreu i SPAK ka thënë se hetimet nuk kanë përfunduar dhe se roli i Veliajt po hetohet, por nuk deklaroi nëse ai është regjistruar si një person nën hetim.
“Pati shumë tema që u diskutuan, më kryesoret kishin të bënit për hetimet e krerëve të politikës. Një ndër temat ishte hetimet për inceneratorin e Tiranës. Sipas meje është e pahetuar sic duhet dhe nuk janë prekur përgjegjësit e asaj afere.
E kemi pyetur për disa emra. Hetimi për inceneratorët është i fragmentarizuar. Zoti Dumani është pyetur për rolin që ka patur Erion Veliaj dhe përse ai nuk është në mesin e 15 urdhër arresteve.
Ai tha se hetimi për inceneratorin e Tiranës po vijon dhe po hetohet roli i kryetarit të Bashkisë së Tiranës, Erion Veliaj, por nuk sqaroi a është regjistruar si person nën hetim.
Është pyetur për hetimin ndaj zonjës Kryemadhi, ai tha se vijon hetimi për të, me cfarë kuptova unë, hetimi nuk kishte të bënte me një cështje, por me cështje të parave dhe hetim pasuror të çiftit Meta-Kryemadhi.
Është pyetur për cështjen McGonigal dhe tha se ka hetime për këtë cështje dhe është vënë në dijeni kallëzuesi, në rastin konkret Gazmend Bardhi, por i është kërkuar të mos flasë publikisht për këtë cështje, duke qenë se hetimet varen nga informacionet që vijnë nga SHBA.
Ka një hetim të ri për zotin Ilir Beqaj. Sot janë kontrolluar disa kompani farmaceutike, Delta Pharma. Ka dyshime për zotin Beqaj që mund të ketë lidhur kontrata klienteliste. Ishin shumë kompani dhe për të mos cënuar asnjërën, po them janë kontrolluar shumë. Kam qenë vetë personalisht dhe kam kryer filmime.
Është pyetur për hetimin ndaj Ahmetajt, që ai është hetim në punë e sipër, sepse ka shumë emra të tjerë, që me sa kuptuam po hetohen. U pyet edhe për çështjen Gërdeci”, tha Lala.
Discussion about this post