Kryebashkiaku i Beratit, Ervin Demo dhe ministrja e Infrastrukturës Belinda Balluku, bëjnë “pasim dhe gol” me tenderin e madh 1.9 milionë euro për kanalizimet në lagjen Uznovë. Për këtë u vjen në ndihmë biznesmeni me lidhje të forta politike Shkëlqim Kapllanaj që është favorizuar në këtë prokurim.
Në datë 10 maj 2024 u shpall përokurimi me objekt “Ndërtim i Rrjetit të Ri të Kanalizimeve të Ujërave të Zeza të Lagjes Uznovë, Rajoni Nr.3 Bashkia Berat” me vlerë 1.9 miliardë lekë. Bëhet fjalë për zonën në foto, ku duken dy-tre rrugica anë të të cilave do të hapen kanalet e reja për ujërat e zeza. Projekti dhe fondi limit janë llogaritur dhe firmosur nga Ervin Demo, ndërsa paratë nuk janë të bashkisë por, të buxhetit të shtetit të ardhura përmes ministrisë së Belinda Ballukut.
Në këtë pikë kemi një pyetje për drejtuesin e bashkisë, pse kanalizimet nuk u bënë që në vitin 2021 kur u paguan miliona lekë për rehabilitimin e kësaj lagjeje në Berat?!
“Rreth 2 mijë banorë të lagjes “Uznova” në Berat do të kenë tashmë një rrugë me infrastrukturë të përmirësuar. Vijojmë punimet për rehabilitimin e infrastrukturës në lagjen “Uznovë”. Do të vazhdojmë shumë shpejt me ndërhyrjet për përmirësimin e infrastrukturës në lagje të ndryshme”, shprehej Demo në atë kohë.
Epo ky tender i fundit na tregon se e i ke bërë punët shkel e shko, zoti Demo!
Formalisht tenderi zhvillohet nga Shoqëria Rajonale e Ujësjellës Kanalizimeve që ka administrator Pelivan Sinajn, por fondi është siguruar nga ministrja Balluku, e cila pas shpalljes së falimentimit është bërë aksionere me 51% të kuotave. Në fakt, fjalën e tij e thotë edhe kryetari bashkisë Berat, Ervin Demo, i cili po ashtu është aksioner dhe drejtori është një mik i vjetër i tij.
Drejtor Pelivani, siç duket nga dokumenti i mësipërm e katandisi shoqërinë në atë situatë sa nuk paguante as borxhet.
Shpesh herë është sekuestruar llogaria e ujësjellësit nga shoqëritë përmbarimore. Por nga tenderi që po raportojmë del qartë pse ky zyrtar vazhdon të jetë i preferuar edhe për kryetarin e bashkisë edhe për ministren Balluku.
Gara për tenderin është hapur deri më datë 27 maj 2024 dhe janë dorëzuar 8 oferta të ndryshme. Në të njëjtën ditë që është mbajtur tenderi, njeriu i Demos dhe i Ballukut ka shpallur tak -fak fituesin. Në fakt fituesi është shpallur pa garë dhe duke shkelur rregullat e përcaktuara në ligjin për prokurimet publike.
Sepse shohim që 7 prej ofertave janë përjashtuar që në fazën e parë edhe pse firmat, SALILLARI Shpk me ofertë 1.4 mln euro, NG STRUCTURES Shpk me ofertë 1.4 mln euro dhe bashkimi i operatorëve HTM Shpk &ASFALT Shpk me ofertë 1,5 mln euro, kishin propozimet më të lira dhe duheshin marrë në konsideratë. Në fakt nuk janë marrë, bashkë më ofertat e tjera ato janë skualifikuar me arsyetimin se nuk kanë deklaruar numrin e punonjësve të kërkuar ose për oferta “anomalisht të ulëta”.
Tenderi ka pasur edhe operatorë që kanë vendosur ofertën zero lekë, që tregon pjesëmarrje fiktive.
E vetmja kompani që kaloi fazën dhe shkoi e vetme në fazën finale ishte firma “SHKELQIMI 07 SHPK, në pronësi të Shkëlqim Kapllanajt. Propozimi 1.8 milionë euro është shumë më i shtrenjtë se ofertat që u skualifikuan nga gara.
Open Data Albania i ka vendosur “Flamur të kuq” tenderit për të treguar riskun e korrupsionit në këtë kontratë.
Shkëlqim Kapllanaj është tashmë një emër shumë i dëgjuar në aferat me tenderat, pasi shpesh ka marrë fonde duke qenë i favorizuar nga lidhjet dhe qëndrimet politike të vëllai i tij, ish-deputeti demokrat, Agron Kapllanaj.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post