Tenderi i kryetarit Ervin Demo për llamba dhe tela skuqet nga shkeljet gjatë prokurimit. Dhe kjo ndodh në Agjencinë e Shërbimeve Publike, e cila vazhdon me direktivat e kryetarit, pa pyetur për rekomandimet që i ka lënë KLSH në vitin 2023. Ky është një tender që përsëritet çdo vit dhe nxjerr nga arka shuma të konsiderueshme. Kështu, në vitin 2022, agjencia në varësinë e Demos shpenzoi 9 166 590 lekë në prokurimin me të njëjtin objekt. Ndërsa në vitin 2021, bleu 6 599 980 lekë materiale elektrike.
Në fakt, pritej që Demo ta mblidhte dorën, pasi KLSH në raportin e auditimit të vitit 2023, në lidhje me këtë agjenci gjeti parregullsi në llogaritjen e fondit limit të tenderave dhe vendosjen e kritereve të kualifikimit për operatorët. Drejtori Bledar Çili e kishte bërë baltë, saqë KLSH propozoi për zyrtarin “vërejtje me paralajmërim për pushim nga puna”.
Vetëm disa muaj më pas, drejtoresha e re Joana Melengu ka firmosur dokumentet e tenderit të shqyer nga abuzimet. Prokurimi ka objekt ‘blerjen e materialeve elektrike’ për vitin 2024 dhe fond limit 5.994.900 lekë.
Në tender kanë marrë pjesë 8 kompani, por me një të rënë të lapsit janë skualifikuar 7 prej tyre me argumente që mund të mos sillnin menjëherë eliminimin.
Kështu, kërkesa të paplotësuara si “noterizim dokumentesh”, “paraqitja e mostrave pas afatit”, janë plotësisht të zgjidhshme brenda procesit të prokurimit duke komunikuar me kompanitë. Për më tepër, dy nga kompanitë e skualifikuara kanë oferta më të ekonomike se sa firma e shpallur fituese.
Kështu, kompania SARK SHPK ka ofruar ta bëjë furnizimin me 5 522 200 lekë, ndërsa “Olsi motors” SHPK ka propozuar ta kryejë me 5 000 000 lekë.
Sigurisht që Demos nuk i bëhet vonë që të kursejë fondin limit, por të qiras klientët e tij me këto tendsera.
Kështu, në fazën finale ka mbetur vetëm zarfi me ofertën e firmës KOLOSEU shpk, të cilës iu dha kontrata.
Tenderi është vlerësuar nga Open Data Albania me “flamur të kuq” për riskun e korrupsionit.
Ndërkohë, kompania fituese në pronësi të Jani Qosjes njihet për tenderët që i përfiton kryesisht nga Bashkia Kuçovë, Berat dhe bashkia Dimal, shpesh herë me “Flamur të kuq”.
Më së shumti janë përmendur tenderët që Qosja merr nga kryebashkiaku Kreshnik Hajdari, ku përmendim këtu tenderin 400 milionë lekë për rikonstruksionin e rreth 1.5 km rrugë të fshatit Goraj, tenderin 90 milionë lekë për materiale elektrike, tenderi 100 milionë lekë Shpenzime për mirëmbajtjen e rrjetit elektrik, si dhe të tjerë.
Meqenëse kryetari Demo nuk shqetësohet nga vërejtjet që i ka bërë Kontrolli i Lartë i Shtetit, duket se po ndjek shembullin e disa kolegëve të tjerë që janë përballur më vonë me akuzat e SPAK për shpërdorimet që kanë kryer.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post