Kryebashkiaku i Beratit, Ervin Demo, shpërdoron fondin prej 542 MLN lekësh për rregullimin e shtëpive të romëve. Projekti i madh për riparimin e shtëpive të familjeve rome dhe të varfra në disa bashki, si kjo e Beratit, po ushqen korrupsionin lokal. Ky është një projekt i bukur për propagandë elektorale nga kryebashkiakët, ndërkohë që shërben për të xhiruar fondet tek miqtë e tyre.
Më datë 7 nëntor 2023, Bashkia Berat ka publikuar kontratën e tenderit me objekt “Përmirësimi i banesave ekzistuese për komunitetet të varfra dhe të pafavorizuara”. Demo ka llogaritur jo pak, por 542 milionë lekë në dispozicion të këtij projekti.
A do të shkojnë këto lekë tek familjet e romëve të pastrehë?
Kjo vihet në dyshim, nëse shohim si është zhvilluar prokurimi i këtij fondi. Shohim se për këtë tender kanë shfaqur interes 5 kompani, ku dy prej tyre kishin ofertat më të lira, me 420 milionë lekë, pra 120 milionë lekë më lirë se fondi limit. Por, të dyja këto kompani, bashkë me dy të tjerat janë skualifikuar nga gara që në fazën e parë, pas asnjë justifikim ligjor.
Kështu, mbeti mbi tryezë vetëm oferta e bashkimit të operatorëve LIQENI VII SHPK në pronësi të Ramazan Kalisë dhe SARDO SHPK, me vlerë 510 milionë lekë, sa 87% e fondit limit dhe 100 milionë më shumë se ofertat e përjashtuara. Pikërisht në këtë pikë nis abuzimi, por Demo i ka anashkaluar kërkesat e ligjit mbi prokurimet dhe i ka dhënë këtyre firmave menjëherë kontratën.
Prokurimi është vlerësuar me risk të lartë korrupsioni nga Open Data Albania dhe është shënuar me “Flamur të kuq”.
Ato lekë që do të filtrojnë nga procesi i korruptuar i këtij tenderi do të përdoren për meremetimin e 55 shtëpive në qytetin e Beratit dhe në fshatra.
Sipas preventivave të firmosura nga kryebashkiaku, kompania fituese do të vendosë sipas rastit “Tavan me kartonxhes”, do të bëjë “suva” brenda shtëpive, hidroizolim me bitum, suva solete, veshje me pllake majolike, çati me tjegulla, shtresë dërrasash, suva fasade, bojë plastike, dyer e dritare alumini me xham, etj.
Familjet rome në harresë
Në listën e familjeve që do t’u meremetohen shtëpitë nuk ka përfaqësues të “shtresave të pafavorizuara”, siç e ka emrin projekti (mungojnë romët e pastrehë). Në fakt projekti ka qenë i krijuar fillimisht për komunitetin rom, por u fut më pas edhe kriteri “familje të varfra” që e zgjeron rrethin e përfituesve.
Në vitin 2022 është ngritur si problem në shumë media se janë 50 familje Rome të pastreha, që jetojnë të bashkuara në periferi të qytetit që prej viteve ’90. Skamja i ka detyruar të mos i arsimojnë fëmijët e tyre. Rreth 100 fëmijë të këtij komuniteti, nga mosha 7-17 vjeç janë analfabetë, vetëm disa prej tyre kanë bërë vetëm një ose dy klasë shkollë dhe më pas e kanë lënë arsimin 9-vjeçar.
Berat, 2022
Banorët e komunitetit rom shprehen se familjet e tyre kanë shumë pak të ardhura dhe për këtë arsye e kanë të pamundur t’i dërgojnë fëmijët në shkolla. Një tjetër arsye sipas tyre është edhe largësia e shkollave ekzistuese dhe ata kanë frikë për fëmijët pasi duhet të kalojnë rrugën vetëm
Edhe vetë fëmijët e këtij komuniteti shprehen se nuk shkojnë në shkollë sepse nuk kanë lekë dhe se shkollat janë shumë larg dhe pse shprehin dëshirën e madhe për të arsimuar. Sipas statistikave vetëm 12 nga 117 fëmijë rom të moshave 6-17 vjeç ndjekin arsimin 9-vjeçar, ndërkohë që asnjë fëmijë nga 0-6 vjeç nga kjo lagje nuk shkon në kopshte apo çerdhe. Me sa duket këto familje nuk kanë interes elektoral për kryetarin e bashkisë Berat.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post