Biznesmeni Paulin Gega ka marrë dhuratën e radhës nga kryetari i Bashkisë Berat, Ervin Demo. Një tender është vënë në lëvizje për të blerë naftën që i duhet makinës së tij dhe për mjetet e institucioneve vartëse. Bëhet fjalë për prokurimin me objekt “Blerje karburant për nevojat e Bashkisë Berat dhe drejtorive vartëse”. Për këtë furnizim janë lënë në dispozicion 250 milionë lekë.
Procedura u hap më datë 8 maj 2024 dhe ofertat priteshin deri më 23 maj 2024. Deri në këtë afat shihet që ka paraqitur interes vetëm firma “GEGA CENTER GKG”, në pronësi të Donike Gegës, themeluar nga Paulin Gega.
Vetëm kjo situatë përbënte një arsye të fortë që tenderi të anulohej, duke zbatuar atë pikë ligjit ku thuhet se ‘në mungesë të konkurrencës apo të ofertave të vlefshme, projekti duhet të anulohet dhe të bëhet rishikim i kritereve’. Nga ana tjetër, tenderi mund të bëhet me një pjesëmarrës, sipas ndryshimeve në ligj, por jo duke mos u verifikuar fare oferta e propozuar.
Sigurisht që kryebashkiakët tanë as nuk marrin mundimin të shqyrtojnë dhe verifikojnë, sepse kanë planin e tyre, ku në çdo prokurim shohin mundësinë e përfitimit.
Kështu bëri edhe Demo, duke shkelur ligjin më datë 23 maj 2024, e mbylli tenderin dhe më datë 6 qershor publikoi kontratën me fituesin “GEGA CENTER GKG” që kishte një ofertë sa 100% e fondit limit. Po si nuk e vuri dorën zemër Gega ta kursente pak fondin limit të firmosur nga Demo?!
Open Data Albania pasi e ka analizuar tenderin me filtrat saj, e i ka vendosur “Flamurin e kuq” për riskun e korrupsionit.
Berati ka gjetur rehat me Gegën
Firma e Paulin Gegës prej vitesh fiton tenderët për karburant nga Bashkia Berat dhe siç shohim në tabelën më poshtë, të gjitha këto prokurime renditen në listën e gjatë të kontratave pa garë.
Megjithëse Gega është akuzuar për evazion dhe pastrim parash, kompania e tij ka vazhduar të jetë e preferuar për zyrtarët e tenderëve. Në listë, shohim se bëhet fjalë për tenderë me shifra të larta për blerje karburanti, madje edhe në vitet 2020, 2021, 2022 kur vendi ishte në krizën e pandemisë dhe pas goditjes së tërmetit.
Si konkluzion mbi tenderin e fundit të Demos duhet të themi që kujdesi ka qenë vetëm të ruhet fitimi maksimal i kompanisë Gega dhe jo të kursehet buxhetit i shtetit. Oferta e operatorit ekonomik është: norma e fitimit 23.5 lekë për litër dhe vlerë totale 24 394 666 lekë pa TVSH!
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post