Kryetari i Bashkisë Berat, Ervin Demo e harxhoi karburantin gjatë fushatës elektorale për zgjedhjet e 14 majit, ndërkohë që bënte gati furnizimin e ri. Duke marrë mandatin e ri kishte siguruar sërish qesen e re për mikun e vjetër të karburanteve. Ai ka vendosur të blejë naftë për makinën e tij dhe të vartësve pikërisht tek biznesmeni që ka për zemër kur vjen fjala për tenderët e karburanteve.
Më datë 29 qershor 2023, Bashkia Berat ka çuar përpara procedurën e tenderit me numër reference REF-70723-05-26-2023 dhe objekt “Blerje karburant për nevojat e Bashkisë Berat”. Konkretisht Demo do të blejë 170 mijë litra naftë dhe 2 mijë litra benzinë për këtë vit.
Më konkretisht, më datë 13 qershor 2023, Bashkia Berat mbylli garën dhe pa e zgjatur shumë më 29 qershor shpalli fituese ofertën e firmave BOE GEGA CENTER GKG SHPK & GEGA OIL GROUP SHA. Ato vepruan si bashkim kompanish, megjithëse kanë të njëjtin pronar.
Konkretisht, “GEGA CENTER GKGh”, është në pronësi të Donika Gegës dhe GEGA OIL GROUP SHA është në pronësi të Kaludio Gegës, Genc Gega dhe Paulin Gega, që në fakt janë një familje.
Oferta e tyre ishte në të njëjtin nivel me fondin limit 254 milionë lekë pa TVSH (300 Milionë lekë me TVSH). Pra, ofereta ishte sa 100% e fondit limit! Por, për këtë tender nuk pati asnjë konkurrent tjetër dhe kështu Demo ia fali kontratën Paulin Gegës. Prandaj, për riskun e lartë të korrupsionit me fondin, monitoruesi Open Data i ka vënë tenderit një “Flamur të kuq”.
Demo siç duket e ka klient të përvitshëm Paulin Gegën e “Gega Oil”, sepse edhe në vitin e shkuar, në shkelje të ligjit është furnizuar me naftë nga kjo kompani. Në qershor 2022 është bërë tenderi nga Ervin Demo dhe vlera e prokuruar ka qenë e njëjta. Ndërkohë, edhe fituesi i tenderit është i njëjtë, “Gega Oli”. Pra, duket më shumë si një tender copy-paste, vetëm datat e publikimit janë ndryshuar.
Paulin Gega, biznesmeni i akuzuar për evazion
Ditën që Ervin Demo e qeraste mikun e tij nga Shkodra me 300 milionë lekë, Shoqëria e hidrokarbureve “Gega Oil” me pronar Paulin Gegën nga Shkodra, është gjobitur me 50 milionë lekë nga Autoriteti i Konkurrencës, pasi është gjetur me shkelje. Mësohet se kjo shoqëri nuk ka njoftuar autoritetet për bashkimin me shoqërinë tjetër “Genklaudis SHBA”. Pas vlerësimit të efekteve që ka sjellë transaksioni në tregun përkatës, u konstatua mbivendosje midis aktiviteteve të palëve në nivel kombëtar në tregun e naftës dhe benzinës. Me pak fjalë, Gega tani i vendos vetë çmimet në treg, sepse ashtu si Kastrati, kontrollon pjesë të mëdha të tregut. Në këtë fuqizim të oligarkut Gega ka rolin kryesor edhe Ervin Demo me shokë që i japin tenderët poshtë tavolinës kësaj kompanie.
Doni më për Gegën? Nëse gjeni një biznesmen të favorizuar nga kryebashkiakët dhe ministrat Ramës, nuk ka dyshim se pasaporta e tij është e inkriminuar dhe e skeduar nga policia dhe prokuroria.
Në 10 prill 2019, pak ditë pasi iu bllokua tregtimi i karburantit për shkak të problemeve, administratori i ‘Gega Oil’ është shpallur në kërkim me urdhër ndalimi nga Prokuroria.
Sipas policisë, Paulin Gega, përmes subjektit “Gen Klaudis Sha” që njihet me emrin tregtar “Gega Oil”, ka kryer evazion fiskal në përmasa të konsiderueshme.
Megjithë shpalljen e tij në kërkim, policia sqaronte, Gega ishte larguar nga Shqipëria.
“Policia e Shtetit në bashkëpunim me organet tatimore, ka ndjekur veprimtarinë e tatimpaguesit « Gen Klaudis ShA », në vijim të zbatimit të Planit të Masave kundër Informalitetit dhe Evazionit Fiskal në sektorët e Turizmit, Ndërtimit, Hidrokarbureve, Tregtimit të mallrave me akcizë, dhe ka ushtruar kontroll në datën 07.08.2019.
Nga kontrolli tatimor janë gjetur pompa, të cilat në shkelje të ligjit, funksiononin në regjim manual dhe për këtë arsye, është kryer bllokimi i tregtimit të karburantit nga ky subjekt.
Menjëherë pas bllokimit, u kryen hetime intensive që çuan në konkluzionin se administratori i kompanisë, shtetasi Paulin Gega, përmes subjektit “Gen Klaudis Sha” që njihet me emrin tregtar “Gega Oil”, ka kryer evazion fiskal në përmasa të konsiderueshme.
Po ky shtetas është proçeduar katër vjet më parë nga Drejtoria e Policisë Shkodër, për veprën penale fshehje e të ardhurave.
Pas veprimeve të saj hetimore, Policia e Shtetit i referoi në Prokurorinë e Rrethit Gjyqësor Tiranë, materialet në ngarkim të shtetasit Paulin Gega.
Prokuroria nxori një urdhër ndalimi për këtë shtetas, i cili rezultoi se është larguar nga vendi në dt.09.08.2019 .
Shtetasi Paulin Gega u shpall në kërkim për veprat penale “Fshehja e të ardhurave” , “Ndryshimi në aparatet matëse” dhe “Pastrimi i produkteve të veprës penale”:, njoftonte policia në atë kohë. Paulin Gega e mbylli çështjen pas një viti në gjykatë dhe tashmë vazhdon biznesin me Ervin Demon me shokë!
Lexo edhe:Autoriteti i Konkurencës gjobit me 50 mln lekë “Gega Oil”
Discussion about this post