Ministri i ri i Financave, Ervin Mete, po e mbyll buxhetin e vitit 2022 me abuzime dhe “Red Flag”. Ditën e sotme është publikuar tenderi me objekt “Studim i fizibilitetit dhe projekt-ide për lidhjen hekurudhore Durrës-Prishtinë”. Punimet nuk dihet se kur fillojnë, por vetëm për studimin e fizibilitetit të projektit do të shpenzohen 2 miliardë lekë. Për të kryer këtë shërbim, Metes i janë paraqitur 5 oferta, ku ajo e “YUKSEL PROJE A.S ishte më e lira me vlerë 1.5 miliardë lekë.
Gjithsesi ministri nuk e ka marrë parasysh këtë kriter të rëndësishëm dhe shohim që ai ka pranuar njërën nga ofertat më të shtrenjta me vlerë 1.7 miliardë lekë e paraqitur nga bashkimi i operatorëve “ILF Consulting Engineers Austria GmbH” & ABKONS SH.P.K. Këto dy firma duhet të sigurojnë katër inxhinierë dhe një ekonomist të cilët do të japin ide për projektin dhe do të përfitojnë 2 miliardë lekë.
Ministri Mete nuk ka marrë parasysh vlerën e ofertave, por ka zbatuar porosinë për t’ua dhënë tenderin miqve të vjetër të kryeministrit.
Edhe ish-ministrja Ibrahimaj që e nisi përgatitjen e këtij tenderi, kishte favorizuar të njëjtën kompani.
ILF Consulting Engineers Austria GmbH” duket si garniturë në këtë bashkim operatorësh, pasi përfaqësohet me prokurë nga “ABKONS” SHPK. “De facto” gjithçka është në dorë të “ABKONS” SHPK e cila zotërohet në masën 70% nga “BLESSED INVESTMENT”, e cila në masën 100% është pronë e Besnik Leskajt, djalit të eksponentes së PS-së, Valentina Leskajt.
Si e mori tenderi Leskaj?
Historia nuk është vetëm kaq! Konkretisht, afera ka nisur më herët sepse tenderi i ka hedhur hapat e parë në tetor të vitit 2022. Ndërkohë në prill të këtij viti Gijotina.com tregoi se si u anulua tenderi për studimin e fizibilitetit për ndërtimin e hekurudhës Durrës-Prishtinë. Parashikohej që studimi i planit do të zgjaste një vit e 2 muaj, pra të përfundojë deri në fund të vitit 2023.
Por, ja fundi i 2023 erdhi dhe deri më tani puna e vetme që është bërë, është plotësimi i kërkesës së Leskajt. Ndërkohë, tenderi pasi ishte “denoncuar” në KPP më datë 19 dhjetor 2022 nga kompania austriake “ILF Consulting Engineers Austria” GmbH, dhe ajo “Abkons” SHPK pëqr të zvarritur procesin.
Në këtë ankimim ata pretendonin se Hekurudha Shqiptare si autoriteti kontraktor në këtë projekt i ka skualifikuar pa të drejtë dhe pa shqyrtuar sipas ligjit dokumentet e tyre.
Sipas informacioneve zyrtare, këto dy firma janë përjashtuar se kanë pasur mungesë dokumentesh për të përmbushur kriterin “shërbim konsulence”, si dhe mangësi në raportimin e të dhënave financiare për vitin 2020.
Po tani, a i plotësuan kriteret austriaku dhe Leskaj? Epo pas një “denoncimi” tek Jonai Myzyraj, kryetari i KPP. rruga hapet dhe legalizohen shkeljet. Prandaj ILF Consulting Engineers Austria” GmbH, dhe “Abkons” SHPK morën fitoren automatikisht.
Kështu ministri Mete e pati të lehtë ta merrte vendimin që këto 2 miliardë lekë, ashtu siç ishte porosia nga lart, të shkonin tek zoti Leskaj.
Mashtrimet e Leskajt me koncesionin e hekurudhës Ballsh- Fier-Vlorë
Djali i Valentina Leskajt dhe ortakët e tij mashtrojnë me koncesionin e linjës hekurudhore Ballsh-Fier-Vlorë, duke mos kryer investimet e premtuara dhe fshehin të ardhurat. Në vitin 2016, Agjencia Prokurimit Publik shpalli fituese të garës për dhënien me koncesion 25 vjet të rrjetit hekurudhor në linjat Fier – Ballsh dhe Fier – Vlorë” kompaninë “Abrail”, bashkim i shoqërive “ALB-STAR” sh.p.k & “MATRIX KONSTRUKSION” dhe ARC. Dy kompaniët e fundit i përkasin Besnik Leskajt dhe Arjan Leskajt, djalit të ish-nënkryetares së Kuvendit të Shqipërisë, Valentina Leskaj.
Vlera e investimit për rikostruksionin e hekurudhës, të premtuar në kontratë, ishte 2.4 miliardë lekë ose rreth 20 milionë USD. Qëllimi ishte që hekurudha të transportonte naftën nga rafineria e Ballshit dhe e Fierit, si dhe naftën bruto drejt parkut “Petrolifera” në Vlorë.
Por gjithashtu koncesionari ka detyrimin të rivendosë transportin e udhëtarëve.
Sipas kontratës së koncesionarit sasia mesatare e transportuar e mallrave/mineraleve për vit kalendarik parashikohej të ishte 2.5 milionë tonë dhe numri i pasagjerëve 307 mijë në vit. Koha e zbatimit te punimeve ishte përcaktuar 46 muaj nga nënshkrimi i kontratës dhe vlera e investimit (pa TVSH) është 2,4 miliardë lekë.
Por edhe pas 7 vitesh, ky sistem hekurudhor nuk kryen shërbimet për të cilat detyrohet. Këtë ka konstatuar Kontrolli i Lartë i Shtetit gjatë një auditimit të krye në Ministrinë e Infrastrukturës në lidhje me këtë projekt. Në raport thuhet se, Kontrata e koncesionit “Rehabilitimi, operimi dhe transferimi (ROT) i rrjetit të transportit hekurudhor në linjat Fier-Ballsh dhe Fier –Vlorë” nuk është realizuar sipas afateve treguesit e performancës.
Kjo është një arsye e mjaftueshme që projekti i rëndësishëm i linjës Durrës-Prishtinë të mos i jepej Leskajt!
Lexo edhe: Berberi i fal 740 mijë € djalit të Valentina Leskajt pa garë
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016
Discussion about this post