Ish-deputeti demokrat Ervin Salianji ka shprehur mbështetjen për protestën e studentëve dhe të rinjve që po zhvillohet në Tiranë, duke e lidhur revoltën e tyre me problemet sociale dhe politike në vend.
Në një reagim në rrjetet sociale, Salianji rendit si shqetësime kryesore mungesën e meritokracisë, pabarazinë, padrejtësitë dhe korrupsionin, të cilat, sipas tij, po ua vështirësojnë të rinjve ndërtimin e një të ardhmeje në Shqipëri.
Ai ka kritikuar gjithashtu mënyrën se si Policia e Shtetit është përballur me protestuesit, duke e cilësuar reagimin e saj çnjerëzor. Sipas ish-deputetit, kjo sjellje dëshmon krizën politike të kryeministrit Edi Rama.
Salianji u bën thirrje autoriteteve të marrin përgjegjësi për situatën, ndërsa shprehet se pakënaqësia e qytetarëve nuk mund të shuhet përmes dhunës.
Në fund të reagimit, ai thekson se protesta e të rinjve është një shenjë se shpresa për ndryshim në Shqipëri ende ekziston.
Reagimi i Salianjit
Shqipëria po shpërfaq sot në shesh mllefin e akumuluar nga keqqeverisja, revoltën dhe zemërimin e të rinjve, duke treguar se ky vend ende ka shpresë!
Pamundësia për të jetuar me dinjitet, mungesa e meritokracisë, padrejtësia, pabarazia, kapja e shtetit nga krimi, korrupsioni masiv dhe mbyllja e çdo dere për një të ardhme më të mirë, ua kanë bërë të pamundur të rinjve të ndërtojnë jetën që meritojnë në vendin e tyre.
Reagimi çnjerëzor i regjimit është dëshmi e agonisë politike të Ramës, e humbjes së çdo kufiri moral dhe e kalbëzimit të plotë të qeverisjes së tij.
Në vend që të dëgjojë qytetarët dhe të marrë përgjegjësi për gjendjen ku e ka zhytur vendin duke dhënë dorëheqjen, ai zgjedh dhunën, arrogancën dhe prepotencën për t’iu imponuar një shoqërie që nuk pranon më të nënshtrohet. Por një popull që ngrihet për dinjitetin, lirinë dhe të ardhmen e tij nuk mund të mposhtet me dhunë!
Shqipëria ka ende shpresë, sepse të rinjtë e saj nuk janë dorëzuar!
Discussion about this post