Deputeti i Partisë Demokratike, Ervin Salianji deklaroi mbrëmjen e sotme se PD dhe asnjë parti nuk vjen në pushtet nëse nuk ka partneritet të mirë me SHBA-në.
Gjithashtu ai u shpreh se diskutimet që po ndodhin brenda PD-së janë ato që kanë ndodhur brenda çdo partie politike pas një humbjeje dhe nuk kanë lidhje me jetën parlamentare.
“Gjithë diskutimet duhet të bëhen si të përmirësohet PD, Basha ka marrë një mandat 4-vjeçar në qershor. Unë shoh se kush po bën luftë dhe kush po rri në vetëpërmbajtje, bashkimi nuk vjen duke e tejkaluar me gjuhën. Në të gjitha rastet nuk ka përjashtim në PD, e ka thënë përfaqësuesja e SHBA, a do PD të ketë një marrëdhënie të qëndrueshme me SHBA? PD ka në qendër vokacionin perëndimor, dhe nuk ka vend me vokacion më perëndimor se SHBA” – u shpreh Salianji.
Salianji theksoi se një pjesë e funksionarëve apo ish-funksionarëve të PD-së kanë nxitur vendimmarrje të gabuara për këtë forcë politike, siç është lënia e mandateve, duke iu referuar këtu ish-kryeministrit Sali Berisha.
