Deputeti i Partisë Demokratike, Ervin Salianji, ka reaguar me tone të forta pas vrasjes tronditëse të gjyqtarit të Apelit, Astrit Kalaja, brenda ambienteve të gjykatës në Tiranë. Ai e cilësoi ngjarjen jo vetëm si një krim të rëndë, por si një dëshmi publike të dështimit të sistemeve shtetërore për të garantuar sigurinë.
“Sot, kur një magjistrat është vrarë brenda mureve të gjykatës, në ambientin që duhet të jetë më i sigurti në republikë, nuk kemi të bëjmë thjesht me një krim të rëndë. Kemi të bëjmë me shfaqjen publike të dobësisë së policisë, protokolleve të sigurisë dhe shpërndarjes së përgjegjësisë brenda shtetit,” – deklaroi Salianji.
Duke i shprehur ngushëllimet më të sinqerta familjes së gjyqtarit Kalaja dhe të plagosurve, deputeti demokrat tha se ky moment tmerri nuk mund të kalojë pa përgjegjësi institucionale dhe pa veprim të vendosur nga ana e autoriteteve.
Ai e cilësoi dhunën brenda një institucioni të drejtësisë si një goditje të drejtpërdrejtë ndaj themeleve të shtetit ligjor, duke paralajmëruar se ky nuk është një rast i izoluar.
“Sulmet ndaj magjistratëve janë jo vetëm tragjedi për familjet dhe kolegët, por edhe sinjal i qartë që institucionet tona po dështojnë në detyrën më themelore: të sigurojnë rregullin dhe të mbrojnë qytetarin dhe zbatimin e ligjit,” – tha ai.
Salianji rikujtoi se edhe në të kaluarën ka pasur kërcënime dhe sulme ndaj gjyqtarëve dhe prokurorëve, që sipas tij kanë kaluar pa ndëshkim dhe kanë krijuar klimën e rrezikut të vazhdueshëm për funksionarët e drejtësisë.
Discussion about this post