Ish-deputeti i Partisë Demokratike, Ervin Salianji, ka reaguar ashpër ndaj qeverisë së Edi Ramës pas skandaleve të fundit, duke e akuzuar se institucionet shtetërore kanë rënë nën ndikimin e krimit të organizuar.
Në një postim në rrjetet sociale, Salianji shprehet se “shteti i Ramës i ka ulur pantallonat përballë krimit të organizuar” dhe se institucionet nuk i shërbejnë më shtetit dhe qytetarëve.
Sipas tij, krimi i organizuar ka depërtuar në institucionet që duhet ta luftonin atë, ndërsa pushteti i ka kthyer ato në mburojë të interesave të veta.
Salianji thekson se përballë kësaj situate, qytetarët duhet të dalin në sheshe, rrugë dhe pranë institucioneve për të kërkuar ndryshimin.
Ai deklaron se nuk duhet pritur që një shtet, të cilin e konsideron të kapur, të çlirojë vetveten.
“Shtetin duhet ta çlirojnë qytetarët”, shkruan Salianji, duke bërë thirrje për të larguar llumin institucional.
Postimi i Ervin Salianjit:
Shteti i Ramës i ka ulur pantallonat përballë krimit të organizuar! Qytetarët duhet të vershojnë në sheshe për të çliruar institucionet nga llumi!
Institucionet më të rëndësishme shtetërore janë faktuar që janë ose emërime të bandave, ose nën influencën e bandave dhe nuk i shërbejnë më shtetit e qytetarëve!
Ky nuk është më një shtet që lufton krimin, por një shtet që është në dorën e gysrave! Krimi i organizuar ka depërtuar në institucionet që duhet ta luftonin atë, ndërsa pushteti i Ramës i ka kthyer institucionet në mburojë të interesave të tij. Përballë kësaj kapjeje të shtetit e vetmja rrugë e mbetur janë qytetarët në shesh, në rrugë dhe në institucione për të shkulur me rrënjë llumin që ka mbuluar gjithë ngrehinën kriminale të Ramës!
Të mos presim më që shteti i kapur të çlirojë vetveten. Shtetin duhet ta çlirojnë qytetarët!
Ky vend nuk është pronë e Ramës, as e bandave dhe as e pushtetit të tyre.
Është koha për t’ua marrë Shqipërinë nga duart atyre që e kanë kthyer shtetin në instrument të krimit dhe pushtetin në mburojë të tyre!
Discussion about this post