Ditën e shtunë pritet të mbahet Kuvendi i PD, thirrur nga ish-kryeministri Sali Berisha, ndërsa dy ditë me herët pritet të mbërrijë në Tiranë zyrtari i lartë amerikan Gabriel Escobar.
Deputeti demokrat Oerd Bykykbashi i ftuar në studion e “ABC LIVE” u shpreh se ai për çështjen e Sali Berishës di aq sa Lulzim Basha dhe sipas tij, SHBA nuk ka kërkuar përjashtimin e ish-kryeministrit nga grupi i PD-së.
“Kjo narrativë që i kanë kërkuar heqjen nga grupi parlamentar nuk është e vërtetë. Nuk e kanë kërkuar. Mbi këtë çështje unë di po aq sa zoti Basha. Është më komplekse se kaq, por nuk mund ta detajojmë këtu. Le të themi diçka, korrupsioni nuk mund të përdoret si armë, ka prova për këtë, dhe ato dërgohen në gjykata. Asnjë shtet nuk ndërhyn në zhvillimet e brendshme të një partie“, tha Bylykbashi.
Por përpos Sali Berishës a rrezikojnë edhe njerëzit që janë në mbështetje të tij? Bylykbashi nuk mendon kështu.
“Ja ku jam unë që kam mbajtur qëndrime shumë të forta në këtë çështje, i jam bashkuar lëvizjes jo për shkak të PD-së, por asaj që besoj se është kriza e rëndë dhe kjo që po ndodh tregon që sistemi imunitar i partisë reagoi, nuk është shembulli i vetëm i autokratizimit të Bashës për atë që bëri në 9 Shtator, që ishte përpjekja e fundit. Ata me të cilët dialogoj, përfshirë në ambasadën e SHBA, nuk i kam dëgjuar këto. Mund t’ju them që përfaqësues të komunitetit ndërkombëtar inkurajojnë këtë përpjekje për demokratizim të PD-së. Përfaqësues të rëndësishëm të komunitetit ndërkombëtar” tha ai.
Deputeti i PD-së premton surpriza pas ditës së shtunë. “Në 11 Dhjetor do të merren vendime të rëndësishme dhe në 12, Basha nuk do të ketë mundësi të marrë vendime. Në datë 11 miratohet statuti tjetër, të gjitha kompetencat centralizuese që ka marrë Basha ikin. Prisni se mund të ketë gjëra interesante” shtoi ai.
Gabriel Escobar në Tiranë vjen edhe në një moment kur SHBA ka njoftuar masat e reja që do të ndërmarrë kundër korrupsionit dhe personave që i cilëson si të padëshiruar.
Discussion about this post