Dy ditë para mbërritjes së Gabriel Escobar, i dërguari i Posaçëm për Ballkanin Perëndimor që do të vizitojë Tiranën, ambasada e SHBA ka zbardhur axhendën e takimeve.
Sipas njoftimit të ambasadës, Escobar do të takohet me kryeministrin Edi Rama, kryetarin e Partisë Demokratike Lulzim Basha dhe ministren e Jashtme Olta Xhaçka.
“Më 9 dhjetor, Zëvendës Ndihmës Sekretari i Shtetit i SHBA për Çështjet Europiane dhe Euroaziatike dhe i Dërguari i Posaçëm për Ballkanin Perëndimor Gabriel Escobar do të zhvillojë vizitën e tij të parë në Shqipëri, me qëllimin për të thelluar miqësinë tonë të ngushtë, e mbështetur në vlerat e përbashkëta demokratike. Escobar do të takohet me Kryeministrin Rama, Ministren e Jashtme Xhaçka, Kryetarin e Partisë Demokratike Basha dhe udhëheqës të tjerë për të rikonfirmuar mbështetjen e palëkundur të Shteteve të Bashkuara për demokracinë e Shqipërisë, integrimin në BE, bashkëpunim më të fortë në mbrojtje dhe mundësi për tregti e investime”, shkruan ambasada.
Escobar pritet të konfirmojë mbështetjen e SHBA për demokracinë në Shqipëri, si dhe luftën kundër korrupsionit dhe përpjekjet për të minuar demokracinë në Ballkanin Perëndimor.
Vizita e Escobar në Tiranë përkon dy ditë para Kuvendit Kombëtar të thirrur nga ish-kryeministri Sali Berisha, i shpallur non grata nga SHBA pak muaj më parë. Gjithashtu në 9 dhjetor, SHBA do të njoftojë sanksionet e reja për personat që konsiderohen si të padëshiruar në SHBA, përfshirë këtu ish-kryeministrin.
Kjo vizitë dy ditë para Kuvendit nuk duket aspak rastësi, pasi Berisha ka akuzuar vazhdimisht Sekretarin e Shtetit se nuk ka prova për non-gratën e tij, kështu pritet me padurim deklarata e Escobar për ngjarjen që tronditi PD-në.
Discussion about this post