Escobar vlerëson Osmanin: Jeni trashëgimia e raporteve SHBA-Kosovë

I dërguari i ShBA-ve për Ballkanin Perëndimor, Gabriel Escobar e ka quajtur presidenten Vjosa Osmani, trashëgimtare të marrëdhënieve bilaterale mes SHBA-së dhe Kosovës.

Ai këto komente i bëri pas takimit që zhvilloj me presidenten Osmani.

“Faleminderit zonja Presidente për mikpritjen e ngrohtë në Kosovë. Ju jeni karakteri kryesor dhe trashëgimia e marrëdhënieve bilaterale mes SHBA-së dhe Kosovës dhe dua të them se kjo trashëgimi është e bazuar në një përkushtim të qëndrueshëm për sigurinë, integritetin territorial dhe pavarësinë e Kosovës”, u shpreh Escobar.

Osmani pas takimit deklaroi se bashkëpunimi me aleatët, konkretisht me SHBA-të, duhet të jetë bosht i veprime që merr Kosova.

“Sapo përfunduam një takim përmbajtjesor me emisarin e SHBA-së, diskutuam për zhvillimet e fundit si dhe për proceset e rëndësishme që po kalon Kosova. SHBA-ja përgjatë çdo sfide kanë qëndruar përkrah Kosovës. Bashkëpunimi me aleatët, veçanërisht me SHBA-në, duhet të jetë bosht i veprimeve tona”, tha ajo.

Presidentja ka theksuar se grupi paramilitar serb që mori pjesë në sulmin në Banjskë më 24 shtator duhet të përballet me drejtësinë në Kosovë.

“Duhet të ketë përgjegjësi për këtë akt agresioni dhe sulm terrorist. Serbia duhet ti ekstradojë të gjithë ata që ishin të përfshirë në këtë sulm. Ne do të vazhdojmë ti zbatojmë standardet më të larta për një gjykim të drejtë dhe do të vazhdojmë të punojmë krah përkrah me aleatët e në veçanti me SHBA-të që kufiri ynë të jetë i sigurt dhe të parandalojmë sulme të tilla në të ardhmen”, u shpreh Osmani.

Sa i përket dialogut, Osmani shtoi se suksesi i këtij procesi varet nga qasja parimore dhe e barabartë e BE –së ndaj palëve.

“Është thelbësore të ketë zbatim të plotë të marrëveshjeve të dakorduara vitin e kaluar veçanërisht ajo e Ohrit. Angazhimi i SHBA-së në këtë drejtim mbetet kyç për një përmbyllje të suksesshme të dialogut që do të çojë në njohje të ndërsjellë, siç edhe është thënë në letrën e presidentit Biden.”

Osmani shtoi se në bashkëpunim me aleatët edhe çështja e dinarit do të rregullohet.