Zbardhet vendimi vendimin që i fali 2 vite 7 muaj e 9 ditë burg duke liruar nga qelia Julian Gjoshin, kunatin e Altin Hajrit, që vrau me armë zjarri të dielën e 1 dhjetorit në Ndroq të Tiranës 50-vjeçarin Alfred Dedja.
Gjoshi ra në pranga më 19 janar të 2021, pas një kontrolli rutinë të forcave operacionale “Shqiponjat” ku e konstatuan duke drejtuar mjetin në gjendje të dehur.
Pas kontrolleve në makinë poshtë sediljes së shoferit, i gjetën një armë zjarri pistoletë dhe karikatorin me fishekë brenda saj.
Gjykata e Tiranës vendosi ta lirojë nga qelia 26-vjeçarin më 23 dhjetor të vitit 2023, ndërkohë që gjykimi i tij u bë me procedurë të shkurtuar, ku përfitoi zbritjen e dënimit me 1/3.
Gjyqtarja Shefkie Demiraj (Mataj), pranoi pretencën e Prokurorit Hysni Mulaj për ta dënuar Gjoshin me 6 vite, por aplikoi nënin 59 të Kodit Penal mbi rrethanat lehtësuese.
Në vendimin e Gjykatës bien në sy një sërë elementesh, nga një problem shëndetësor i të pandehurit, nevoja e babait të tij për përkujdesje, pendesa e thellë e të riut apo respekti që ai dhe familja e tij gëzonin në komunitetin ku jetonin.
Arsyetimi
Gjykata merr në konsideratë faktin se i pandehuri ka mbajtur qëndrim pendues ndaj veprave penale të kryer nga ana e tij gjatë shqyrtimit gjyqësor.
Gjykata, në aplikimin e nenit 59 te K Penal ka në qendër të vëmendjes gjendjen e rëndë shëndetësore të të pandehuri ku sipas raportit te koreografisë datë 21.09.2020, është arritur në konkluzion Infarkt akut miokardi pa ngritje të segmentit ST, në pacient me stenozë kritike të trunkut komun dhe sëmundje 3-vazale të artiereve koronare.
Gjykata gjithashtu në aplikimin e nenit 59 të K Penal ka në qendër të vëmendjes faktin se i pandehuri dhe familja e tij gëzojnë respekt në komunitetin ku jetojnë.
Gjykata merr në konsiderate edhe gjendjen e rënduar shëndetësore të babait të të pandehurit ku sipas aktit mjekësor nr 1213, regjistri lëshuar nga mjekja J.C., ndër të tjera thuhet se duhet të ketë familjarin në çdo moment për përkujdesje.
Veç kësaj, vijon në arsyetimin e saj gjykata, nga arma e zjarrit të sekuestruar, nuk është provuar të jetë bërë qitje nga i pandehuri, ndërkohë që rezultuan se pistoleta dhe fishekët, ishin në gjendje normale për qitje.
Gjatë leximit të vendimit, ngrihen pikëpyetje mbi një deklarim të Julian Gjoshit në momentin e dëshmisë para OPGJ-së se arma nuk ishte e tij por e kishte gjetur në rrugë dhe do ta dorëzonte në Komisariat.
Në vendimin e Gjykatës, palët pranuan autorësinë e të riut, dhe nuk pasqyrohet më tej, nëse ky deklarim ishte i saktë apo i rremë.
Julian Gjoshit iu falën 2 vite 7 muaj e 9 ditë burg duke e vënë në provë për një afat 3 vjeçar, me kusht që gjatë kësaj kohe i pandehuri të mos kryejë vepër tjetër penale.
/Ora News/
Discussion about this post