Pak ditë pasi kryeministri Edi Rama ndau lajmin e zbulimit të një sasie të madhe gazi dhe nafte nga kompania SHELL, vjen dhe reagimi i kësaj të fundit. Në në prononcim për FaxNews, përfaqësues të kompanisë holandeze shprehen se ende nuk mund të flitet për një zbulim të tillë, pasi ende nuk ka përfunduar analizimi i të dhënave të marra nga “Blloku 4”.
“Nuk kemi përfunduar analizimin e të dhënave të marra nga studimi gjeofizik i kryer në vitin 2021 në Bllokun 4. Studimi gjeofizik është kryer në Mars 2021 deri në Korrik 2021 dhe prej asaj kohe dmth, nga korriku 2021 e andej nuk kemi aktivitet në Bllokun 4 që përfshin zonën e Këlcyres dhe Përmetit. Aktualisht nuk kemi aktivitet atje”, thuhet në reagimin e SHELL-it.
Kujtojmë që Rama nga Holanda tha se kompania e madhe holandeze SHELL ka zbuluar një sasi të madhe nafte dhe gazi që siç tha ai do të luajë rol edhe në të ardhmen energjetike të Evropës.
“Kemi edhe kënaqësinë e privilegjin për të pasur në vendin tonë SHELL-in.
Kemi shumë shpresë që së shpejti do të mund të ndajmë me opinionin tonë publik, dhe pse jo me atë rajonal dhe përtej rajonit, një zbulim shumë të rëndësishëm që SHELL po arrin të realizojë në vendin tonë.
Ata hezitojnë të flasin për shifra për momentin, por shenjat tregojnë se mund të jemi në fazën e një zbulimi shumë të rëndësishëm në tokë të gazit dhe naftës që jo vetëm do të ndikojë jashtë mase të ardhmen e vendit tonë, por në këto rrethana të caktuara do të luajë rol në të ardhmen energjetike të Evropës”, tha Rama.
Discussion about this post