Deputeti demokrat, Lefter Gështenja, ka publikuar një video mbi aferën e inceneratorëve, ku thekson se “është zbuluar vetëm maja e ajsbergut”, ndërsa fajëson kryeministrin Edi Rama duke e konsideruar si të korruptuar.
Sipas deputetit, hetimet i kanë dhënë të drejtë PD-së, ku shkruan se 17 procedura janë kryer brenda 24 orëve vetëm për të miratuar koncesionin për inceneratorin e Elbasanit, ndërsa thekson se përveç Ramës janë të përfshirë dhe zyrtarë të tjerë.
“430 milionë euro është afera korruptive e inceneratorëve me dijeninë dhe mbështetjen e Edi Ramës.
Hetimet e para i dhanë të drejtë PD, por deri tani është zbuluar vetëm maja e ajsbergut. 17 procedura janë kryer brenda 24 orëve vetëm për të miratuar koncesionin për inceneratorin e Elbasanit. Këto procedura përfshijnë edhe Arben Ahmetajn , Damjan Gjiknurin, Ëngjëll Agaçin, e shumë zyrtarë të tjerë. Por natyrisht, asgjë nuk do të mund të ishte bërë pa dijeninë dhe miratimin e Edi Ramës.
Shqipëria është sot vendi më i korruptuar i Europës. Rama është i korruptuar. Qeveria e tij është e korruptuar. Me këta në krye, Shqipëria nuk mund të ketë zhvillim. Shqiptarët duhet ta braktisin të shkuarën dhe të korruptuarit”, shkruan Gështenja.
Opozita e konsideron skandalin e inceneratorëve si më të madhin deri tani, ndërsa në burg ka përfunduar ish-ministri Lefter Koka dhe janë shpallur në kërkim Stela Gugallja dhe Klodian Zoto.
Discussion about this post