Portali i njohur i Brukselit, EurActiv, publikoi sot një shkrim ku thekson që në titull se ‘fantazma’ e Lulzim Bashës është shfaqur përpara zgjedhjeve lokale.
“Komisioni Qendror i Zgjedhjeve bëri të ditur se ish-kryetari i Partisë Demokratike, Lulzim Basha është ai që ka të drejtë të paraqesë kërkesën e partisë për të marrë pjesë në zgjedhjet e ardhshme vendore, pasi nuk ka dhënë dorëheqjen zyrtarisht nga regjistri i parties, kur ai dha dorëheqjen publike në mars 2022,” shkruan EurActiv.
“Por ndërkohë që Basha dha dorëheqjen publikisht, ka dalë në dritë se ai nuk ka dorëzuar zyrtarisht dorëheqjen në regjistrin e partive, i cili mbahet në Gjykatën e Rrethit të Tiranës, ku janë të shënuara të gjitha detajet e partisë, përfshirë edhe emrin e kryetarit.
Në vend të kësaj, tre ditë përpara se të jepte dorëheqjen në mars të vitit 2022, ai nënshkroi autorizimin për delegimin e kompetencave te nënkryetarët e partisë, Enkelejd Alibeaj, Endrit Sefa dhe Gazment Bardhi, për zgjedhjet e vitit 2023.
Më pas, zëvendësit dorëzuan dokumentet në KQZ për regjistrimin e PD-së si subjekt zgjedhor.
Në goditjen e fundit ndaj partisë së përçarë të qendrës së djathtë, KQZ njoftoi se nuk e njeh autorizimin për delegimin e kompetencave dhe se Basha duhet të dorëzojë vetë të gjitha dokumentet që lidhen me zgjedhjet e ardhshme.
Ligji thotë se një kryetar mund të delegojë përgjegjësi vetëm nëse ai mungon ose është i sëmurë, jo në rast të dorëheqjes. Ndaj KQZ-ja nuk mund t’i njohë dokumentet e dorëzuara nga Bardhi, dhe duke qenë se dorëheqja e Bashës nuk u regjistrua zyrtarisht dhe ai mbetet, në letër, të paktën kryetari i partisë, duhet të jetë ai që do t’i paraqesë.
KQZ i ka dhënë PD-së 48 orë kohë për të dorëzuar dokumentet e sakta, përndryshe rrezikojnë të mos marrin pjesë në zgjedhje”, shkruan EurActiv.
Discussion about this post