UEFA njoftoi se kishte marrë më shumë se 20 milionë kërkesa për bileta për ndeshjet e Kampionatit Evropian në Gjermani në vitin 2024, gjatë fazës së parë të shitjeve, e cila përfundoi të enjten.
“Në total, më shumë se 20 milionë kërkesa për bileta u pranuan nga 206 vende gjatë periudhës së parë të shitjeve, e cila u zhvillua midis 3 dhe 26 tetorit 2023, me 7.8 milionë kërkesa të bëra në 24 orët e para”,- thuhet në deklaratën e UEFA-s.
Në fazën e parë të shitjes së biletave për kompeticionin, e cila do të zhvillohet mes 14 qershorit dhe 14 korrikut 2024, UEFA do të vejë në dispozicion 1.2 milionë bileta, me çmime që nisin nga 30 euro.
Sipas UEFA-s, rreth 65% e kërkesave janë bërë nga tifozët gjermanë, të ndjekur nga Anglia, Franca, Spanja dhe Austria.
Shtetet e Bashkuara të Amerikës, Kanadaja, Australia, Kina dhe Meksika, me gjithsej 525.000 kërkesa, ishin vendet jashtë Evropës me më shumë kërkesa.
Ndeshja hapëse, me Gjermaninë nikoqire, dy takimet e tjera të fazës së grupeve me skuadrën gjermane dhe finalja ishin, sipas UEFA-s, ato që shënuan kërkesën më të madhe për bileta.
“Për finalen e cila do të zhvillohet në stadiumin “Olimpik” të Berlinit më 14 korrik janë kërkuar 2.295.665 bileta, një numër 33 herë më i madh se kapaciteti i stadiumit”,- thekson UEFA, duke shtuar: “Për ndeshjen hapëse janë marrë 1.408 bileta regjistrime, një numër që përkon me 21 herë kapacitetin e “Arenës” së Mynihut, e cila do të jetë nikoqire e takimit”.
Faza e dytë e shitjes së biletave për fazën finale të “Euro 2024”, në të cilën skuadra portugeze ka garantuar tashmë prezencën, do të zhvillohet nga 2 dhjetori.
Kampionati Evropian do të luhet në 10 qytete gjermane: Berlin, Këln, Frankfurt, Mynih, Gelsenkirchen, Shtutgart, Hamburg, Dortmund, Leipzig dhe Dyseldorf.
Discussion about this post