Kur na ndajnë 6 ditë nga sfida e parë e Shqipërisë në fazën finale të Euro2024, që do të luhet më “Signal Induna Park” të Dortmundit, Federata Shqiptare e Futbollit ka publikuar edhe listën e plotë të numrave që do të mbajë në fanellë secili prej 26 djemve të grumbulluar nga tekniku Sylvinho.
Sulmuesi kryesor i Shqipërisë duket se do të jetë Armando Broja, të cilit Silvynho i ka besuar pozicionin e titullarit në dy sfidat miqësore me Lihteshtejnin dhe Azerbajxhanin. Këtë duket se e konfirmon edhe fakti që bomberi i Chelseat do të mbajë mbi supe numrin 11.
Numri 1 do t’i takojë Etrit Berishës, ndërsa Strakosha do të mbajë mbi shpinë numrin 23. Sa i përket portierit të tretë të Kombëtares, Elhan Kastrati do të ketë numrin 12. Numrat në mbrojtje duket se nuk kanë pasur ndryshime, ndërsa numri 7 i është dhënë Rey Manajt.
Ndërkohë, pas zbarkimit të djeshëm në Dusseldorf, kombëtarja shqiptare udhëtoi menjëherë drejt Kaiseraut, kampit bazë ku do të qëndrojë përgjatë përgatitjeve në Euro Gjermani 2024.
Pas akomodimit në qendrën sportive, trajneri Sylvinho dhe stafi teknik kanë vendosur t’i lënë lojtarët pushim të dielën. Pra sot nuk do të ketë seancë stërvitore. Të hënën, skuadra kombëtare do të vijojë normalisht seancat stërvitore që do të jenë si zakonisht të hapura për mediat, për 15 minutat e para.
Discussion about this post