Prej të paktën 5 vitesh çdo makinë që kalon në rrugën e Kombit paguan taksën në traun e Kastratit, i cili pothuajse çdo vit tejkalon planin e mbledhjes së të ardhurave.
Debati për traun në rrugën e Kombit është i vjetër, po aq sa debate lidhur me favorizimin që i bëhet nga Qeveria koncensionarit, që duket se tejkalon të ardhurat me taksat që mbledh, përtej dakordësisë që ka rënë me Qeverinë, dhe askush nuk i kërkon llogari për milionat shtesë.
Por çështja që po trajtojmë sot është nga ato raste sa në shkelje të ligjit, aq edhe shqetësues për xhepin e qytetarëve.
Gijotina.com është njohur së fundmi me fenomenin e qarkullimit të eurove false nga ata që “kujdesen” te trau i Kastratit për të mbledhur taksën e rrugës.
Sipas një denoncimi, drejtuesi i një mjeti, ka kryer pagesën në euro, ka marrë reston, të cilën e ka përdorur në kthim, por nga punonjësi i traut të Kastratit i është komunikuar se prerja ishte false.
Këtë prerje, përdoruesi i rrugës, e kishte marrë nga kolegu i punonjësit të traut të Kastratit, që arriti të dallonte menjëherë se kartmonedha ishte false.
Pra, punonjësi i parë i traut, në drejtimin për në Kosovë, i ka dhënë drejtuesit të automjetit një kartmonedhë false, si resto ndaj pagesës së kishte bërë. Ndërsa në kthim, drejtuesi i mjetit ka përdorur kartmonedhën që ia kishin kthyer si kusur në rrugën e parë, por që është konstatuar të ishte false.
Gijotina.com ka marrë disa denoncime të ngjashme përsa i takon të njëjtit fenomen: qarkullimit të eurove false, pavarësisht prerjeve 5 apo 10 euro, që vihen në “punë” nga ata që mbledhin tarifën.
Nuk dihet nëse kjo është thjesht një lojë e punonjësve të traut, apo një gjë më e madhe, pasi këtë çështje duhet ta monitorojnë organet përkatëse, por një fenomen i tillë rëndon xhepin e atij qytetari që zgjedh të kalojë përmes rrugës së Kombit.
Përtej vjedhjes që i bëhet me kursin e këmbimit, ku 1 euro në traun e Kastratit shkëmbehet me 130 lekë, dhe çdo automjeti veturë i kërkohet të paguajë 5 euro ose 650 lekë, tani drejtuesit e automjeteve duhet të kenë njohuri për të njohur edhe prerjet, pra nëse janë ose jo false.
Nëse nuk i kanë këto njohuri, dora e zgjatur i grabit dyfish në mos më shumë, në rast se nuk do t’ju ndodhet prerja 5 euro, për të kryer pagesën.
Ndaj te rruga e Kombit bëni kujdes, të paktën te trau lejoni t’ju vjedhin vetëm me kursin e këmbimit, mos t’ju grabisin edhe me euro-t false…
Discussion about this post