Banka e Shqipërisë nuk do të ndërhyjë në kursin e këmbimit valutor pavarësisht rënies së Euros në vendin tonë.
“Nuk kemi asnjë arsye për të ndërhyrë. Kemi monitoruar në mënyrë të vazhdueshme tregun dhe kemi vënë re që sjellja e tregut ka reflektuar kursin e këmbimit në mënyrë normale, nuk kemi sjellje spekulative ose faktorë psikologjik të cilat të ndikojnë në kursin e këmbimit. Nuk kemi arsye për të ndërhyrë por duhet bashkëpunuar me eksportuesit dhe ato industri që preken nga ndryshimi i kursit të këmbimit”, tha guvernatori i BSH-së, Gent Sejko, gjatë një konference për mediat.
Sejko bëri publike dhe vendimin e Këshillit Mbikëqyrës për ta mbajtur të pandryshuar normën bazë të interesit, në nivelin 3%.
“Presionet e larta inflacioniste nga ekonomia e brendshme mbeten një faktor rreziku për stabilitetin e çmimeve në vend”, tha ai.
Ai shtoi se inflacioni i lartë dhe mbi objektivin e bankës qëndrore është i dëmshëm për familjet dhe bizneset, pasi gërryen fuqinë blerëse të të ardhurave të tyre dhe vështirëson planifikimin e konsumit dhe investimeve në të ardhmen.
Banka Qëndrore parashikon se ritmi i rritjes ekonomike në vend pritet të vijë në ngadalësim të lehtë gjatë vitit 2023, por do mbetet në territor pozitiv. Gjatë kësaj kohe, inflacioni parashikohet të shënojë rënie graduale për t’u kthyer në objektiv në gjysmën e parë të vitit 2024.
Discussion about this post