Shqipëria e vajzave U-19 zhvilloi mesditën e sotme ndeshjen e tretë dhe të fundit ndaj Irlandës së Veriut, e vlefshme për raundin e dytë të kualifikueseve të kampionatit Europian për këtë grupmoshë. Në sfidën e zhvilluar në stadiumin “Egnatia Arena”, vajzat kuqezi u mundën me rezultatin 0-5.
Trajnerja Luçije Gjini hodhi në fushë këtë formacion: Rajmonda Spahiu (GK), Herta Hasaj , Angela Nika, Xhesika Ndoj (C), Klesta Ago, Rosela Vasa, Stiljana Guga, Rigela Hysa, Valerie Adela Qose, Era Methoxha, Stela Vata.
Takimi nuk nisi mirë për përfaqësuesen shqiptare, pasi kundërshtaret kaluan që në minutën e 3-të në avantazh falë një goli të realizuar nga mesfushorja irlandeze Aimee Kerr. Mikeshat realizojnë edhe golin e dytë nga pika e bardhë e penalltisë në minutën e 34-t me Aime Kerr. Pavarësisht përpjekjeve për të ngushtuar rezultatin, fraksioni i parë u mbyll me rezultatin 0-2 për irlandezet.
Kundërshtaret shënojnë edhe tre gola të tjerë në fraksionin e dytë, duke vulosur rezultatin në 0-5.
Shqipëria e mbylli në vendin e tretë këtë raund të dytë kualifikues të Europianit U-19, me një bilanc prej 1 fitoreje dhe 2 humbjesh. I gjithë raundi i dytë i grupit B4 u zhvillua në Shqipëri dhe u organizua nga Federata e Futbollit në bashkëpunim me UEFA-n.
Të gjitha ndeshjet u luajtën në stadiumet “Elbasan Arena”, “Egnatia Arena” dhe “Shtëpia e Futbollit”.
Discussion about this post