Është luajtur, pasditen e të dielës, takimi i tretë i fazës çerekfinale, të UEFA EURO U21, që po zhvillohet në Rumani dhe Gjeorgji.
Angli dhe Portugalia, dhuruan 90 minuta të zjarrta, për të pranishmit në stadium, me sfidën që përfundoi me fitoren e vuajtur të anglezëve, me shifrat 1-0.
Në pjesën e parë, sfida nisi me të dyja kombëtaret, që kërkuan që në minutat e para, të gjenin golin e epërsisë.
Në disa raste, luzitanët i shkuan shumë pranë golit por mbrojtja angleze si dhe mungesa e precizionit para portës, bëri që rezultati të mbetej 0-0.
Në minutën e 34’, britanikët zhbllokuan rezultatin, falë golit të realizuar nga Gordon. Goli i pësuar, bëri që portugezët të sulmonin më me forcë, drejt portës angleze. Në pjesën e dytë, Anglia u mbyll e tëra në mbrojtje, me Portugalinë që sulmoi për minuta të tëra por pa gjetur golin.
Pas shumë vuajtjesh, anglezët triumfuan, duke siguruar kështu, biletën e fazës gjysmëfinale, ku do të përballen me Izraelin, surpriza e këtij turneu, e cila eliminoi me penallti, Gjeorgjinë.
E kualifikuar gjithashtu, në gjysmëfinale, është dhe Spanja, e cila eliminoi pas 120 minutash, Zvicrën me rezultatin 2-1. Kundërshtari i iberikëve do të jetë fituesi i ndeshjes Francë-Ukrainë që do të luhet këtë të dielë në orën 21:00./m.b /gijotina.com
Discussion about this post