Kombëtarja U21 e Francës ka arritur të marrë një fitore shumë të rëndësishme përballë Italisë, në duelin e vlefshëm për fazën në grupe të UEFA EURO U21 që po zhvillohet në Rumani dhe Gjeorgji.
Në stadiumin e qytetit të Kluzhit, “Gjelat” triumfuan me rezultatin 2-1 përballë djemve të trajnerit Nicolato.
Rezultati u zhbllokua në minutën e 23’, me francezët që kaluan në epërsi falë Kalimuendo.
Barazimi i “Të kaltërve” erdhi në minutën e 36’, me autor Pellegrin.
Me rezultatin 1-1 u mbyll pjesa e parë e sfidës. Në pjesën e dytë, të dyja skuadrat zbritën në fushë me objektiv tre pikët.
Duhet thënë se, Franca ishte fizikisht më lart në 45 minutat e dyta, me Italinë që kërkoi të konkretizonte kundërsulmet por pa sukses.
Në minutën e 62’, transalpinët kaluan përsëri në avantazh, me anë të Barcola, i cili shfrytëzoi gafën e italianit Udogie, duke mposhtur portierin Carnesechi.
Italia, pas golit të pësuar, u hodh e tëra në sulm, për të barazuar rezultatin, megjithatë Franca, arriti që të merrte tre pikët, falë mbrojtjes por edhe reflekseve të portierit Chevalier.
Me këtë sukses, Franca shkon në vend të parë të grupit D, së bashku me Zvicrën, e cila nga ana e saj, triumfoi ndaj Norvegjisë, po me rezultatin 2-1.
Discussion about this post