Gjermania ka zhvilluar ndeshjen e saj të parë në fazën finale të UEFA EURO U21 2023, përballë Izraelit, në stadiumin Ramaz Shengelia të Kutaisit në Gjeorgji.
Teutonët, pavarësisht se ishin favorit në letër përballë kombëtares nga Lindja e Mesme nuk arritën të shkonin më shumë se një barazim një me një.
Takimi mund të kishte nisur ne mënyrë perfekte për Gjermaninë, por Mukoko gaboi nga 11 metrat, në minutën e tretë.
Në minutën e 20’, Izraeli zhbllokoi rezultatin falë Turgeman.
Reagimi i gjermanëve ishte i shpejtë, me Bisek që barazoi pas gjashtë minutash.
Me këtë rezultat u mbyll pjesa e parë e lojës.
Ne fraksionin e dytë, bardhezinjtë u futën në fushë, me qëllimin e qartë për të gjetur golin e fitores, por mbrojtja hebreje i rezistoi sulmeve.
Në minutën e 80’, Gjermanisë iu paraqit mundësia e artë, përsëri me një penallti, mirëpo pika e bardhë, ishte e mallkuar për ta, duke parë që Ngankam gaboi duke u hipnotizuar nga portieri i Izraelit.
Në baraspeshë totale, u mbyll ky takim mes Gjermanisë dhe Izraelit. Të dy kombëtaret i gëzohen pikëve të para në këtë turne.
Discussion about this post