Këtë mbrëmje, janë zhvilluar takimet e treta të grupit B të UEFA EURO U21, ku janë vendosur verdiktet përfundimtare, në lidhje me pozicionimet finale, në renditjen e grupit.
Me Spanjën e Ukrainën, të kualifikuara q në takimet e dyta, falë dy fitoreve në ndeshjet e para, ndeshjet e sotme, ishin thjesht për statistika… deri diku.
Dueli Spanjë-Ukrainë, që u luajt në Bukuresht, u mbyll me rezultatin 2-2.
Në këtë takim, të dyja skuadrat zbritën në fushë, disi të relaksuara, sidomos Ukraina, që në fillimin e ndeshjes, bëri disa gabime trashanike në mbrojtje, të cilat Spanja nuk i shfrytëzoi.
Iberikët patën disa mundësi për të zhbllokuar rezultatin por nuk u treguan të saktë përballë portës kundërshtare.
Në minutën e 43’, Ukraina befasoi në kundërsulm, duke realizuar golin e parë të takimit.
Ishte sulmuesi Vyunnyk, ai që goditi saktë me kokë, duke bërë që të shpërthente festa, në sektorin e tifozëve ukrainas.
Me rezultatin 1-0, u mbyll fraksioni i parë i lojës. Në pjesën e dytë, skenari nuk ndryshoi, pothuajse, fare, me Ukrainën që nuk po hiqte dorë nga amnezitë në mbrojtje.
Në minutën e 49’, “të verdhët” i dhuruan barazimin, Spanjës. Zhelisko ishte i pafat, teksa u gjend përpara trajektores së topit të goditur nga mbrojtësi duke e bërë që rimbalconte në portën e tij.
Ndeshja u duk se do të përfundonte 1-1, por në minutën e 81’, Sudakov dërgoi përsëri, Ukrainën në epërsi, falë një penalltie (shumë të dyshimtë).
Spanja nuk u demoralizua, nga kjo padrejtësi, duke barazuar rezultatin në 2-2, falë Abel Ruiz (90′).
Me këtë rezultat, Spanja arriti që të ruante vendin e parë në grup, duke patur mundësi që të jetë njëra nga favoritet, në fazën çerekfinale.
Ukraina u kualifikua si e dyta e grupit B, ndërsa Rumania dhe Kroacia, e mbyllën EURO U21, me nga 1 pikë./m.b /gijotina.com
Discussion about this post