Eurodeputeti austriak thirrje Ramës: Të protestosh është pro europiane! Të qëllosh me gaz, ujë dhe burgosësh të mitur është antieuropiane

Eurodeputeti austriak dhe bashkëkryetari i Partisë së Gjelbër Evropiane, Thomas Waitz, ka reaguar me tone te ashpra lidhur me protestat e studentëve në Shqipëri, duke kritikuar qëndrimin e kryeministrit Rama.

Në një reagim në rrjetet sociale, Ëaitz ka kundërshtuar qëndrimin e kryeministrit Edi Rama, sipas të cilit protestat mund të rrezikojnë procesin e integrimit të Shqipërisë në Bashkimin Evropian.

Eurodeputeti thekson se protestat që kërkojnë luftimin e korrupsionit, përmirësimin e arsimit dhe mbrojtjen e mjedisit janë në përputhje me vlerat evropiane dhe nuk duhet të konsiderohen pengesë për anëtarësimin në BE.

“Më lejoni ta sqaroj: Protesta për institucione që janë të aftë e të gatshëm të luftojnë korrupsionin është pro-evropiane. Protesta për një arsim cilësor është pro-evropiane. Dhe protesta për mbrojtjen e trashëgimisë natyrore të Shqipërisë është gjithashtu pro-evropiane”, shprehet Waitz.

Eurodeputeti austriak ka kritikuar gjithashtu mënyrën se si autoritetet shqiptare kanë reaguar ndaj protestuesve, duke ngritur shqetësime për përdorimin e gazit lotsjellës, ujëhedhëseve dhe ndalimin e të miturve.

“Pas 13 vitesh në pushtet, Edi Rama u thotë protestuesve se ata janë ‘ekstremistë në duar të huaja’ dhe kërcënon se do të anulojë bursat e arsimin falas. Ai po dërgon gaz lotsjellës, hedhëse uji dhe po ndalon të mitur. Kjo nuk është absolutisht në përputhje me vlerat evropiane”, deklaron ai.

Waitz u shpreh gjithashtu se, rruga e Shqipërisë drejt Bashkimit Evropian duhet të mbështetet te respektimi i të drejtave të qytetarëve, forcimi i shtetit të së drejtës dhe garantimi i lirisë së protestës.

“Të gjithë duam ta shohim Shqipërinë në Bashkimin Evropian si një shtet të së drejtës, si një shtet që respekton të drejtat e qytetarëve, që mbron zonat natyrore dhe që dëgjon qytetarët e saj e respekton të drejtën e tyre për të demonstruar. Kjo është rruga evropiane dhe shpresojmë që Shqipëria ta bëjë veten gati për të”, shprehet eurodeputeti.

Reagimi i tij vjen teksa studentë dhe qytetarë po protestojnë në Tiranë, duke kërkuar dorëheqjen e kryeministrit Edi Rama. Gjatë tubimeve janë regjistruar edhe incidente dhe përplasje mes disa demonstruesve dhe forcave të policisë.