Ambasadorja e Shqipërisë në Izrael, Meri Kumbe ka dhënë detaje të reja mbi situatën e tensionuar në vend.
Në një lidhje të drejtpërdrejt në edicionin qendror të lajmeve në Vizion Plus me moderator Aleksandër Furxhi, znj.Kumbe u shpreh se nga nesër pritet të nisin fluturimet jokomerciale për evakuimin e qytetarëve të huaj, përfshirë shqiptarët.
Ambasadorja e Shqipërisë në Izrael ka vlerësuar bashkëpunimin e ngushtë me Ministrinë e Punëve të Jashtme dhe strukturat e tjera shtetërore, falë të cilit pesë qytetarët shqiptarë janë larguar tashmë të sigurt drejt Egjiptit.
Ndërkohë, sipas znj. Kumbe gjendja e emergjencës në Izrael vijon të jetë në fuqi dhe emigrantët shqiptarë që ndodhen ende atje mbahen në kontakt të vazhdueshëm me ambasadën.
Intervista e plotë:
Cilat janë të rejat më të fundit? Cilat janë lajmet më të rëndësishme në gjithë Izraelin?
Kumbe: Pesë qytetarët shqiptarë, të cilët ndodheshin rastësisht në Tel Aviv dhe që kërkuan evakuim dhe ndihmën e ambasadës, janë larguar të sigurt, siç e ka raportuar edhe ministri Hasani. Ka qenë një përpjekje falë një bashkëpunimi shumë të mirë me të gjithë miqtë dhe partnerët, si dhe një sërë strukturash të shtetit shqiptar, siç është Ministria e Punëve të Jashtme dhe dy ambasadat në Tel Aviv dhe Kajro. Është shumë e rëndësishme të jemi bashkë dhe të mundësojmë për njëri-tjetrin momente të sigurta dhe të jemi pranë njëri-tjetrit. Dhe mendoj se Ministria e Punëve të Jashtme ja ka dalë më së miri. Gjatë momentit që kishim rrugës drejt Egjiptit, qytetarët shqiptarë, rreth orës 11:00 paradite, patëm alarmin e parë me raketa balistike kundrejt Izraelit. Qytetarët tanë ishin duke udhëtuar drejt kufirit të Egjiptit. Ishte një moment që patëm merak, por kaloi mirë. Sulmi i dytë ishte pasdite, rreth orës 15:30-16:00. Vazhdon të jetë gjendja e emergjencës. Do të jetë në fuqi deri më 30 qershor. Punët vazhdojnë të mbyllura, shkollat po ashtu. Pra, njerëzit nuk zhvillojnë aktivitetin e tyre normal, përjashtim bëjnë vetëm supermarketet, farmacitë dhe furrat e bukës. Ka tensione, ka agoni.
Është dita e 5 e luftës. Ambasada shqiptare, pra ju qëndroni në zyrë apo zhvendoseni në kohën e alarmit?
Kumbe: Ne nuk i kemi hapur zyrat. I jemi bindur urdhrit të ushtrisë izraelite për të mos dalë nga shtëpitë në raste të panevojshme. Jemi duke ofruar shërbimet tona nga banesat, ku kemi dhe dhomën e sigurisë brenda banesës. Kjo ka vlejtur edhe për të gjithë trupin diplomatik. E kemi hapur zyrën shumë pak, vetëm kur kemi marrë mjetet ose kur kemi firmosur dokumentet. Por ka qenë shumë pak, më pak se një orë. Ndërkohë që komunikimi me qytetarët është mbajtur nga telefonat dhe kryesisht në WhatsApp dhe patjetër email.
Pesë qytetarë nga Shqipëria duken shumë pak. Janë vetëm këta që kanë dashur të kthehen në Shqipëri? A ka të tjerë aty që duan të lëvizin?
Kumbe: Fatmirësisht numri i turistëve ishte shumë i ulët këtë herë, ishin vetëm pesë persona. Pjesa tjetër që kanë kontaktuar ambasadën janë banorë permanentë të Izraelit. Jemi kontaktuar krejtësisht në aspektin njerëzor dhe nëse kemi pasur nevojë për ndihmë. Një pjesë tjetër e qytetarëve shqiptarë që janë emigrantë në Izrael, është edhe ai një numër shumë i vogël, nuk kërkuan evakuim. Kanë zgjedhur të presin edhe pak ditë për të parë se si do të zhvillohet situata. Ajo që kanë kërkuar nga ambasada ka qenë t’i njoftojmë për të gjitha opsionet që herë pas here do të krijohen për t’u larguar nga vendi. Deri më tani, aeroporti ka qenë i mbyllur dhe portet detare po ashtu. Nga nesër ka njoftime që do të fillojnë fluturime jokomerciale, por për të evakuuar turistët izraelitë që janë jashtë në vendet e ndryshme të botës. Janë një numër shumë i lartë personash që janë larguar nga Izraeli për arsye turistike dhe që presin të rikthehen në vendin e tyre. Po punohet që avionët që do të shkojnë dhe do të vijnë për të sjellë qytetarët izraelitë, të përdoren si kanal për të evakuuar edhe qytetarë të huaj, turistë që ndodhen në Izrael. Deri më tani, evakuimet janë bërë vetëm përmes Egjiptit dhe Jordanisë.
Discussion about this post